PULIS NGA MO-PARK SA DALAN SILUTAN

Tangtangan og binuwan nga allowance ug gasoline subsidy ni Mayor Tomas Osmeña ang mga pulis kinsa padayon nga nigamit sa karsada isip parking area sa ilang mga patrol car.

Ang mayor wa makauyon sa gibuhat sa mga pulis nga sakop sa Police Station 3 sa Cebu City Police Office (CCPO) kinsa niokupar sa usa ka lane atubangan sa ilang buhatan para himuong parking area.

Gawas niini, ang mga sakyanan nga giisyu sa Cebu City Government iyang bawion.

Gipadayag ni Osmeña nga wa niya gitugotan ang mga patrol car nga makagamit sa parte sa karsada isip parking area sanglit usa kini sa makahatag og kahuot sa dagan sa mga sakyanan hilabi na sa mga busy nga lugar.

“No. Send me a text and I’ll have them clamped. If they continue like that, I will cut off all their allowances and cut off their gasoline and I’ll pull out the cars,” awhag ni Osmeña sa publiko.

Ang bahad sa mayor di lang para sa Waterfront Police Station 3, kon di para sa 11 ka mga estasyon sa pulis nga sakop sa CCPO.

Gipahibawo ni Osmeña nga mismo ang iyang sakyanan ug sakyanan sa mga konsehal nga sakop sa Bando Osmeña Pundok Kauswagan (BOPK) nga giparada sa iyang balay sa barangay Guadalupe gi-clamp sa mga enforcer sa Cebu City Transportation Office (CCTO).

Gani, niingon pa si Osmeña kaniadto nga kon maka-clamp sila og mga City Hall vehicles ug police cars, adunay ganti gikan kaniya ang mga enforcer.