NAKUHAA’G 45-KILONG SHABU SA 2015 GIPATAY

NAGPAILANG NEGUSYANTE GIPUSIL SA 3 KA TAWO SA CORDOVA

Namatay diha-diha ang usa ka giingong negusyante nga nasikop ug nakuhaan og 45 kilo nga shabu sa Quezon City niadtong 2015 human siya gi-ambush sa tulo ka mga tawo sa lungsod sa Cordova kagahapon sa alas 8 pasado sa buntag.

Nasalib-ay pa sa bukton sa gipatay sa giingong drug personality nga si Gary Ong Go, giingong Filipino-Chinese ang dakong ladies bag nga abli na ug wa nay sud.

Si Go, kinsa giila sa kapulisan nga drug personality, nahay-ad tungod sa iyang awto, usa ka Honda Civic nga dark green (WSR 671) human nga gipusil sa tulo ka mga tawo nga pasahero sa usa ka van.

Asoy ni Sr. Inspector Janus Giangan, hepe sa Cordova Police Station, nga kagahapon sa alas 8:30 sa buntag, gikan naghatod si Go ang iyang live-in partner sa Sityo Agad-Agad, Poblacion, Cordova.

Sa imbestigasyon ni SP04 Eleazer Llanes, mosakay na unta og balik si Go sa iyang awto, gilabyan kini og gray van nga adunay sakay tulo ka mga lalake, kinsa nanganaug dayon gisundan og buto sa armas.

GIGUKOD

Matod pa sa mga saksi nga usa ka traffic enforcer ang nigukod sa van, apan nibalik sa agi pag-abot sa may Barangay Pilipog, sa kabalaka nga maoy sunod pusilon ilabi na nga armado ang sakay niini.

“Naa siyay (Go) dala nga dakong bag pambabaye. Posible nga gisudlan to og kuwarta,” matod ni Giangan nga nahinabi sa Superbalita Cebu.

Atol sa pagresponde sa Cordova Police, naabtan nga nahay-ad na si Go ug nakaangkon og mga samad pinusilan sa nagkadaiyang bahin sa lawas samtang ang bag nga diha pa sa bukton niini nga abli nang daan, way sud.

“Sa among initial investigation, involved ni siya og drug trade. Naa siyay item (drugs) nga gikuha nga wa gibayran,” dason ni Giangan. Nagtuo ang opisyal nga kuwarta maoy gisudlan sa bag

nga posible maoy tuyo niadtong mga mumuno.

Base sa drug watchlist nga gipadala sa kaulohan, anaa sa listahan si Go.

Sa gihimong monitoring sa Cordova Police, adunay mga ginagmay nga disposal (drugs) si Go sa maong lugar.

Si SP04 Llanes, sa iyang bahin, niingon nga magsulod-gawas sa lungsod si Go ilabi na nga taga-Cordova ang iyang live-in partner.

Dugang pa ni Giangan nga ila pang gisusi ang motibo sa pagpatay ni Go ingon man ang pag-ila sa mamumuno. Lakip nga sutaon kadtong

identification card ni Go nga nakuha gikan niya diin empleyado si Go sa Development Construction Corp. nga nagbase sa Quezon City alang sa ilang usa ka proyekto sa usa ka hotel sa Barangay Mactan, Lapu-Lapu City.

Nakakuha ang mga sakop sa Scene of the Crime Operation (Soco) og usa ka basiyo sa bala sa 9mm ug pito ka basyo sa bala sa kalibre .45 nga pistola.

BACKGROUND

Ang hepe sa Cebu Provincial Police Office Sr. Supt. Manuel Abrugena mimando karon sa Cordova police station nga ilhon ang tulo ka mga gunmen ug ipa-background check si Go.

Wa pa masayod si Abrugena kon kanus-a naabot sa lungsod sa Cordova si Go ug nganong nakagawas siya sa bilangoan nga unta way pyansa ang kaso nga giatubang niini.

Niadtong Hunyo 11, 2015, nadakpan si Go ug laing babaye sa mga sakop Quezon City Police District atol sa gihimong drug buy bust operation.

Nakuhaan si Go og 45 kilos nga shabu nga nagkantidad og P225 milyones sa dihang usa ka poseur buyer ang nagpaka-aron ingnon nga mopalit og lima ka kilong drugas sa West Avenue, corner Bulacan St., Barangay Phil Am, Quezon City.

Ang mga dinakpan gidala sa Camp Karingal aron sa pag-atubang sa kasong kalapasan sa Section 5, 11 and 26 of Republic Act 9165 o ang Comprehensive Drugs Act of 2002.