Bag-ong terminal, buksan sa publiko karon, ugma
Liboan ka mga Sugbuanon ang hatagan og kahigayonan nga maka-tour sulod sa bag-ong Mactan Cebu International Airport (MCIA) Terminal 2 sugod karong adlawa ug ugma sa di ma-operational sa Hulyo 1.
Gawas niini, aduna’y pipila ka mga feature ang maong terminal nga eksclusibo ra sa bag-ong terminal ug ang makapahimulos niini mao ang mga international departing ug arriving guests.
Aron masinati usab sa mga Sugbuanon unsa ang anaa sa MCIA 2, aduna’y guided tours karong adlawa ug ugma sugod alas 9 sa buntag hangtod alas 5 sa hapon.
Matod ni Avigael Maningo, corporate communications manager sa GMR-Megawide Cebu Airport Corporation, nagdumala
sa maong tugpahanan, nga 500 ka mga tawo ang ilang i-accommodate matag oras.
Kinahanglan lang mo pre-register ang gusto sa tour sa ilang Facebook Page, hinuon mamahimo ra ang walkin.
“We wanted to create an airport that not only reflected the tropical resort experience of Cebu in its design and structure, we also wanted it to showcase the best of Filipino service and hospitality,” matod ni GMCAC President Louie Ferrer.
UNSAY NAA
Gawas sa Glulam nga atop niini nga mao’y nagsilbi nga nakapanindot sa maong bagong terminal, mas taas na og lakwan ang mobiyahian tungod kay aduna’y 19-metros nga link bridge gikan sa drop off paingon sulod sa terminal.
Ang check-in counters niini o gitawag nga glowing lanterns mao ang mosugat sa tagsa-tagsa ka pasahero sa pagsulod sa maong terminal. Kon tan-awon nimo ang flooring niini, ginama kini sa Terrazzo nga aduna’y motherof-pearl shards.
Gawas sa Duty Free, aduna’y Momento sulod sa maong terminal, mao ang labing una nga Momento sa nasod diin local products ang gibaligya niini.