3 nakuhaa’g shabu atol sa Oplan Tambay sa Talisay

Gitanggong sa mga kapulisan ang tulo ka tawo, lakip ang usa ka babae, sa dihang nakuhaa kini og ilegal nga drugas atol sa gipahigayon nga Oplan Tambay Sita sa Barangay Tangke, dakbayan sa Talisay kagahapon sa kadlawon.

Ang mga nadakpan mao sila si Efril Labajo Fernandez, 27 anyos, ulitawo, Junmar Cabando, 24 anyos ug Vanessa Hileg Paculaba, 26 anyos, puro mga residente sa maong dapit.

Pasado ala 12 sa tungang gabii kagahapon, ang kapulisan pinanguluhan ni acting Talisay Chief of Police PSUPT Marlu Palomaria Conag, inubanan ni Cebu City Police Office(CCPO) director Manuel Javier Abrugena, mipahigayon sa Oplan Tambay Sita sa may Sitio Galaxy, Brgy. Tangke nga miresulta sa pagkadakop ni Paculaba kinsa naaktuhan nga naghupot sa ilegal nga drugas.

Si Paculaba nakuhaan og 71 ka gagmayng pakete sa gituohang shabu nga motimbang og 1.43 ka gramos nga mokantidad og P16,756.00.

Nianang pagka 1:30 sa kadlawon, ang kapulisan nga pinanguluhan ni PINSP Rene Cerna, Deputy Chief of Police sa Talisay , mipahigayon og motor stop sa may Sitio Kilawan, Brgy. Tangke, nga miresulta sa pagkasikop ni Fernandez ug Canando.

Matod sa kapulisan nga misuway pa unta og ikyas ang duha apan wa kini mahimo kay natuyokan na sila sa kapulisan.

Si Fernandez nakuhaan og 20 ka gagmayng pakete samtang laing 15 ang nakuha gikan ni Canando sa gituohang shabu.

Ang na-recover sa kapulisan nga ilegal nga drugas gikan sa mga suspek mosuma total og kapin P25 mil.

Gibalhug na karon sa Talisay City lock-up facilities ang mga suspek ug gikatagdang pasakaan ug kasong kalapasan sa R.A 9165 o Dangerous Drugs Act of The Philippines.