Color coding sa wire ipatuman sa dakbayan

Sugdan na karong adlawa sa mga utility firm pag-ilis ang ilang mga linya ug ipatuman ang color coding sa ilang mga wire sigon sa kagustohan ni Cebu City Mayor Tomas Osmeña.

Si Konsehal Jerry Guardo, chairman sa committee on infrastructure, nga maoy gitahasan sa mayor pagpatuman sa maong proyekto nakighimamat sa mga representante sa utilities diin ilang himuong pilot area ang Osmeña boulevard atbang sa Department of Health (DOH7).

Si Guardo nagkanayon nga subay sa ilang nasabutan, ang Globe Telecom mogamit og wire nga puti, yellow ang habig sa Philippine Long Distance Telephone, blue para sa Skycable, green ang Eastern Telecom ug giangkon sa CCTN ang orange.

Matod pa ni Guardo nga wala pa makapili ang Visayan Electric Company (Veco) sanglit atol sa ilang gipatawag nga board meeting, wala kini makapadala og representante.

Apan gipadayag sa konsehal nga niingon ang Veco nga gusto nila ang itom nga color sanglit mao kini ang ilang kasamtangan nga gigamit ug mao sab kini ang international nga color. Apan gibutyag sa konsehal nga gusto ni Osmena nga mogamit sila og lain nga color.

Si Guardo niingon nga gitinguha sa mga utility firm nga mahuman ang pilot project sunod semana.

Gawas sa pag-ilis sa mga linya sa kuryente, kuhaon usab sa mga utility firm ang mga mga wire nga nakumbitay sanglit delikado kini sa publiko hilabi na sa mga sakyanan nga moagi.

Si Osmeña gusto nga mailisan ang mga wire pinaagi sa color coding aron dali ra sa mga otoridad pag-ila kon kang kinsang linya ang adunay problema nga nakahatag og kahasol sa publiko sanglit kaniadto magduotduot ang utility firm pag-angkon sa responsibilidad.