BINILYONG SALAPI NAWALA: OSMEÑA
Gipahibawo ni Mayor Tomas Osmeña nga nahikawan ang Cebu City Government og binilyon nga kwarta gumikan sa kapakyas pagbayad og buhis sa libuan ka mga balay patigayon nga nagnegusyo sa dakbayan.
Gitug-an sa mayor nga sa kasamtangan, adunay di mominos 10,000 ka mga balay patigayon ang wala nagbayad og buhis sa dakbayan gumikan sa ilang kapakyas paglukat og Mayor’s Business Permit.
Gitumbok ug gisaway usab ni Osmeña ang mga private hospital ug eskwelahan kinsa nangangkon nga sila dili angay buhisan sanglit ang ilang korporasyon usa ka “non-profit” corporation. Iyang gipikhan ang korporasyon nga maoy tag-iya sa labing dakong mall sa Cebu City ug ang igsuon niining kompaniya nga maoy labing daghang sangang buhatan sa mga banko.
Gihulagway sa mayor nga base sa assessment sa ilang propidad, ang ilang edepisyo daw sama lang sa usa ka payag nga walay elevator, escalator,
generator ug air conditioning unit, dii ubos sa balaod aduna unta kini tax.
Wala sab makauyon si Osmeña nga nibayad lang ang maong banko og P34 sa ilang business tax diin ang mga opisyal niini iya nang napasakaan og kaso.
ARCE MANGULO
Tahasan ni Osmeña si kanhi market administrator Raquel Bohol-Arce kinsa maoy kasamtangan nga pangulo sa Prevention Restoration Order Beautification Enhancement (Probe) sa pagsusi sa mga business establishment nga wala nibayad og buhis.
Ang mayor nagkanayon nga dul-an 5,000 ka mga kawani sa City Hall, si Arce ra ang adunay kaisog ug way kukahadlok nga mopatuman sa balaod nga maoy iyang gituohan nga makapasaka sa koleksyon sa buhis sa siyudad.
Si Osmeña niingon nga iyang i-promote ang ranggo ni Arce ug himuong assistant city administrator ug nikomedya pa ang mayor nga kon mahimo siya ang himuon nga City Treasurer.
Si Arce sa iyang bahin nagkanayon nga bisan unsa nga klase sa trabaho ang itahas kaniya andam kini niyang buhaton sanglit usa lang siya ka kawani sa Cebu City.
Ang mayor nakauyon sa performance ni Arce gikan sa merkado ug gibalhin ngadto sa Department of Social Welfare and Services ug gibalik sa Probe sanglit siya ra ang makapatuman sa mandato sa maong buhatan.