Drug test alang sa elementary gidili na sa Malacañang

Provincial Council for the Welfare of Children (PCWC) nalipay sa desisyon sa Malacanang nga i-atras ang pagpahigayon og drug test alang sa mga tinun-an sa Grade 4.

Matod sa PCWC kinahanglang hatagan og igong gibugaton ang “best interest” sa bata ug ikonsiderar ang posibling epekto niini sa iyang pagdako.

Gihulagway ni PCWC Co-chairman ug bise-gobernador Agnes Magpale nga “sensitibo” pa kaayo ang mga bata nga nagtungha sa Grade 4 o sa bisan unsang grado sa elementarya. Alang niya, hayan magbilin kini og dautang epekto kanila kon ipaubos sila sa drug test sa sayo nilang pangidaron.

Gikalipay ni Magpale nga wala suportahi sa Malacanang ug sa Department of Education ang tinguhang pagpaubos sa drug test sa mga tinun-an sa Grade 4 pataas.

Ang Phil. Drug Enforcement Agency chief nga si Aaron Aquino maoy unang niproponer sa mandatory drug test sa mga tinunan nga nag-edad ug labing menus 10 anyos.

Kon kabataan ang hisgutan, gitumbok ni Magpale nga angayang ikonsiderar kanunay ang “best interest” sa matag indibidwal.

Giangkon ni Magpale nga duna silay gihuptan nga mga kaso sa PCWC nga naglambigit sa mga bata nga may koneksiyon sa drugas.

Alang sa opisyal, mas importante nga mapalapdan ang edukasyon kalabot sa dautang epekto sa drugas ug magmabinantayon ang mga magtutudlo pagtumbok niadtong mga bata nga posibleng nahisalaag na sa sayo nga pangidaron.