Lakang ni Tomas
Kadaghanan sa mga nanag-iya og motorsiklo mao kadtong naa sa medyo ubos nga ekonomikanhong ang-ang sa katilingban sama sa mga drayber og habalhabal o ang gitawag nato nga masa. Sa ulahing pamahayag ni Mayor Tomas Osmeña sa dakbayan sa Sugbo, segurado nga sila mapakpak ug modayeg sa mayor nga niingong maoy mobayad sa multa sa mga motorsiklo nga dakpon nga nagdagan sa dalan nga ‘for registration.’ Kon ang nakadakop sa motorsiklo sakop sa ahensya ubos sa dakbayan, iyang i-waive ang multa.
Nganong mitumaw kini nga ideya sa mayor? Siyempre, walay laing nagpahipi nga rason, pulitika. Ning sayo pa namuhonan na sa masa samtang nagkaduol ang mid-term elections sa sunod sa tuig diin maglakip sa posisyon sa mayor. Siya nakigsulti sa mga nanag-iya og bag-ong motorsiklo ug nasuta nga daghan kanila gidakop ug gipamulta og dili mominos P13,000 tungod sa pagdagan nga walay rehistro. Nasuta niya nga dili sala sa mga nanag-iya og motor, apan ang dealers nga dugay nakasumiter og dokumento ngadto sa ahensiya sa kagamhanan.
Mao kini hinungdan nga nidason sa paghulga si Osmeña sa pagsira sa mga tindahan og motorsiklo nga langay sa ilang pagproseso sa mga dokumento bisan mapalit pa nimo nga cash ang motorcycle unit. Sakto usab ang mayor, ang mga dealer basta makabaligya, sama sa bahala na human ma-release ang units tungod sa pag-apas seguro sa ilang quota?
Humot tinuod ang imahen sa mayor sa masa nga nanag-iya og motor tungod sa bag-ong nahunahunaan nga lakang apan piang lang. Dili lang kini problema sa motorsiklo, lakip ang mga awto ug ubang sakyanan. Nasudnon kini nga kahimtang busa dili masulbad sa “ija-ija, aho-aho” nga batasan. Ug sa tag P13,000 nga multa sa way rehistrasyon, pananglitan og makadakop og subra sa usa ka gatos ka units ang Land Transportation Office (LTO), mobayad kaha ang mayor? Dili kaha saputon? Aw, impas sa sapot sa mayor. Balido kini, maayong masusi pag-ayo.