Ang PNP rubber shoes

Nagbagotbot ang usa ka pulis. Naglisod siya og pangita sa kantidad nga P1,800.

Para asa diay ang maong kantidad, gipangutana ang polis.

Pang-bayad nako og sports attire, maoy iyang tubag.

Wala ba diay kay daan na nga sports attire nga kinahanglan man gyod ka nga mopalit og bag-o?

Duna man koy daan nga sports attire pero duna mi order nga ang bag-o gyod ang ipagamit namo.

Kasohan mig administrative kon gamiton pa namo ang among daan nga sports attire, maoy iyang tubag.

Unsa may naapil sa maong kantidad para sports attire?

Jogging pants, shorts og T-shirt, maoy tubag sa polis.

Kana rang tulo unya P1,800 nay bayad ana nila?

Wala man mi mahimo, tubag sa polis.

Dili gani mi pwede nga mangita og lain nga sastre, usa ra gyod ang among patahian, maoy dugang pasabot sa polis.

Pero dunay mga kauban namong polis nga nag-negosyo.

Kon adto mi palit nila, P1,700 ray ilang kobra, so maka-ganansiya mi og 100, matod pa sa polis.

Mahala man na, matod pa sa nakadungog. Dili kay kana ra, maoy sagbat sa polis.

Buot nimo ipasabot, duna pay lain?

Duna, ang among rubber shoes diay, matod pa sa polis.

Tag-pila diay ang inyong rubber shoes? Tag-2,800, maoy tubag. Unsay brand sa maong sapatos? Wala may brand makita, gawas sa tatak nga PNP, maoy tubag.

Sama sa among sports attire, dili sab mi pwedeng mogamit og laing rubber shoes. Kadto ra gyod nga rubber shoes nga dunay tatak nga PNP ang pwede namong gamiton, dugang pasabot sa polis.

Asa man ninyo paliton ang maong PNP nga rubber shoes?

Usa ra pod ang among palitan sa maong sapatos, matod pa sa polis.

Kon tinuod man gani kini, gihimo ba usab kini dinhi sa atong lugar?

Nasayod ba kaha si PNP Chief Oscar Albayalde niining maong raket?

Kon dili kini matawag og pangurakot, naglibog akong kutaw og unsa kini.

Parehas usab kini sa nahitabo sa DepEd regional office sa Cagayan de Oro City.

Matod pa sa balita, dunay gipamalit nga mga razor ang DepEd sa Cagayan de Oro City alang sa ilang mga senior high school.

Ang kantidad sa razor nga Gillette Vector nga disposable – P1,800 plus. Tagpila diay ang maong razor kon paliton sa mga malls or department stores?

Tag 200 lang.

Bisan pa kon ang kinamahalan nga Gillette razor ang paliton, mapalit lang kini sa tag-1,100 plus. Buot ipasabot, hilabihan ra ka mahal ang maong razor.

Apan matod pa sa DepEd regional director, wala siyay nakitang kahiwian sa maong pagpalit. Susmariosep.