Wa nibayad sa utang

Dear Papa Joe,

Tawga lang ko og Cecilia, minyo, dunay upat ka mga anak nga puros nag-eskwela sa usa ka pribadong tunghaan. Ang akong bana dunay maayong trabaho pero tungod sa kalisod sa panahon karon, di gyud paigo ang iyang sweldo maong namaligya na lang ko. Online seller ko og mga used clothes or ukay-ukay.

Okay ra unta ang kita, sakto gyud nga makasuroy mi ug makakaon sa gawas sa akong mga bata. Pero ang problema kay ang akong mga silingan mangutang, dili na mamayad. Bisan unsaon og singil, unya-unyaon ka lang hangtud nga ako nalay kapuyon og magsigeg balik-balik og paningil sa ila. Wala na ko, makaagwanta nag post ko sa Facebook og patama para nila, pero wala ko nag mention og name. Matod ko pa sa akong post nga ‘KINING MGA TAWO NGA FEELING SOSYAL, PERO ANG UTANG BESH ATIMANA’.

Tungod kay FB ra man mi sa mga nangutang nako, nag post sab siya og mga bati nga patama nako. Maora siyag gihalangan, pero wala sab siya ni mention og name. Hangtod nga naggubat na mig puros patama pinaagi sa FB ug didto mi nag-away. Niaabot pang nangaugkat na ang mga bati nga sekreto namo. Unsay akong buhaton niini? Pwede ba kong makakiha, Papa Joe? CECILIA

Dear Cecilia,

Matod mo, ukay-ukay ang imong negosyo? Pila man sab ang kantidad sa iyang utang? Kon dili kaayo dakog kantidad, timbang-timbanga kon worthy ba nga magdako ang inyong kagubot tungod lang niana? Sa negusyo, duna gyud kay alkanse, duna gyuy mosablay. Leksyon na siguro nimo nga dili kana magpataka og hatag sa imong produkto.

Ayaw nag pautang. Anyway, dili man mapan-os ang mga sinina. Para mahunong ang isyu, ayaw nag reply sa iyang mga patama sa Facebook posts. I-unfriend siya ug paabota lang nga mohupas ang inyong mga kalagot. Magkaamiga ra mog balik. PAPA JOE