Neither one of us
Gikan sa fast food nga among gikan-an, nanan-aw mi si Bonna og sine. Parehas mig hilig og love story. Aw, mga teenger gud mi. Na, wa gyud masulod sa among hunahuna ang salida nga among gitan-w.
Unsaon, si Rommel gihapon ang among gihisgotan.
Malipayon gyud mi si Bonna kon si Rommel na ang among topic.
“Unsa kaha, no, Mayeen, kon akoy pangulitawhan ni Rommel? Na, sugton gyud dayon nako siya.” Mitukikig katawa si Bonna. “Imposible nang mahitabo, uy, Bon. Seguradong ako ang nagustohan ni Rommel. Na, sa higayon nga mangulitawo na siya nako, di gyud nako siya paantuson. Gakson ug hagkan gyud nako siya sa lips.
Ipabatyag dayon nako niya ang katam-is sa akong love.”
Ako na sab ang mitukikig katawa. Unya nagkinataw-anay mi si Bonna. Nahimuot gyud ming duha sa among gugma kang Rommel. Tinuod nuon ang giingon ni Bonna, daghang lalaki sa kalibutan. Apan unsaon man nga si Rommel man ang among gimahal? Sala ba diay kini namo?
“Basta, kon kinsay magustohan ni Rommel, Mayeen, wa tay kahiubsanay.”
“Oo, uy, Bonna. Magpabilin ang atong friendship.”
Unya nag-aper mi si Bonna. Morag na-habit na namo ni Bonna ang pag-aper kon duna mi hisgotan nga makapalipay namo.
Gikan sa sinehan, nangadto mi si Bonna sa Basilica del Sto Nino. Anhi mi magsimbahan every Sunday sa hapon. Ug nahimo na namong handomanan ang maong simbahan bahin sa among lovelife kay dinhi namo gikaila ang lalaki nga sa unang higayon nakapitik sa among kasingkasing.
Pag-abot namo ni Bonna sa simbahan, wa madugay nagsugod na ang Santos nga Misa. Naghilom ming duha. Ingon gyud mi ani kon manimba, di gyud mi mag-estoryahay, ang among hunahuna ug kasingkasing among itingob didto sa Misa. Mao nga masulod gyud sa among hunahuna ug kasingkasing ang gipanulti sa pari.
Pagpanggawas na namo ni Bonna sa simbahan pagkahuman sa Misa, naglakaw lang mi sa sidewalk paingon sa huwatanan namog sakyanan alang sa among pagpauli sa Escario. Unya nakahunong ko paglakaw dihang gikuhit ko ni Bonna. Mitan-aw ko sa dapit nga iyang gitan-aw.
Usa ka snak bar ang gitudlo ni Bonna. Si Rommel ang among nakita nga nag-inusarang nagkaon. (SUMPAYAN)