Marquez sun-on ni Matthysse sa iyang away kontra Pacquiao
Tinguha ni Argentine Lucas Matthysse nga iyang sundugon si kanhi 4-division world champion Mexican Juan Manuel Marquez sa iyang pagpakigharong kang Filipino boxing icon Manny Pacquiao karong Hulyo 15 sa Kuala Lumpur, Malaysia.
Sama ni Marquez, gusto sab ni Matthysse nga makaposte og brutal nga knockout nga kadaugan sa Pambansang Kamao sa Pilipinas.
Ning higayuna nga nagkaduol na ang away, ang trainer ni Matthysse nga si Joel Diaz mas nagmasaligon nga mahitabo ang tinguha sa iyang knockout artist nga batos, kinsa iyang gihulagway nga grabe ka determinado.
Matod ni Diaz nga duha na ka sparmates ang nasakitan sa makusog nga kumo ni Matthysse.
Hinuon giklaro ni Diaz nga dili lang kusog nga kumo ang gikinahanglan ni Matthysse, kon dili ang tayming sa pagbuhi niini.
“One thing is certain, is that Pacquiao is no longer the same fighter that he was five years ago, and he no longer has the same body or reflexes... he is almost 40 years old, but we can not underestimate him,” asoy ni Díaz sa interbyu sa www. boxingscene.com.
Nagtuo sab si Diaz nga nikunhod na ang kusog sa kanhi 8-division world champion ug wala na kini kapabilidad sa pag-knockout kang Matthysse.
Si Pacquiao katapusang nakarehistro og TKO nga kadaugan kaniadto pang 2009 diin iyang gipaundang sa 12th round si Puerto Rican Miguel Cotto.
Ning awaya, depensaan ni Matthysse ang iyang World Boxing Association (WBA) welterweight title batok sa gipangandoy niyang kontra./ESL