Magsayo gikiha

Pormal nang misang-at og kaso ang ALA Promotions ngadto sa Games and Amusements Board (GAB) kabahin sa promotional contract sa usa sa ilang mga boksidor nga si Mark Magsayo.

Ang ALA Promotions, pinaagi sa ilang abogado nga si Sonny Mercado, mikiha kang Magsayo og breach of contract sa opisina sa GAB sa Makati City niadtong Hunyo 20.

Sa walo ka mga pahina nga reklamo, ang ALA Promotions nagtinguha nga sulbaron sa GAB ang isyu kabahin kang Magsayo.

Gusto sa ALA Promotions nga angkunon ni Magsayo nga aduna pa kini buhing promotional contract kanila ug gusto sab niini nga adunay sanction nga ipahamtang ang GAB.

“The Aldeguer family is very considerate. Our approach not so harsh, we don’t want to get anything else from him,” pasabot ni Mercado sa SunStar Cebu. “This kid grew up with them and it’s sad that this had to happen.”

Sa sayong bahin ning buwana, nibaniog sa mga pamantalaan nga mipirma na si Magsayo og kontrata sa laing promoter - Las Vegas-based Now Boxing Promotions – sa rason nga napupos na ang iyang kontrata sa ALA Promotions.

Apan giklaro ni ALA Promotions president Michael Aldeguer nga ang ang managerial contract ra ni Magsayo ang ni-expire ug dili ang promotional contract.

“We have been quite decent about it after it was announced in the newspapers. We kept quiet about it,” dugang ni Mercado.

Si GAB chairman Baham Mitra mipadayag nga mohimo sila og lakang kabahin niining maong kontrobersya.