Senaryo sa PBA lubog pa

Anaa na sa tumoy-tumoy nga dapit sa elimination round ang Philippine Basketball Association (PBA) Commissioner’s Cup apan hangtod ning puntoha, duha pa lang ka mga sitwasyon ang nahan-ay.

Kini mao ang seguradong pag-angkon sa Rain or Shine Elasto Painters (9-1) sa No.1 nga luna bisan unsa pa’y resulta sa katapusan nilang duwa ug ang pagkatangtang nang daan sa NLEX Road Warriors ug Blackwater Elite sa esena sa playoffs.

Ang nahabiling pito sa walo ka mga luna sa playoffs padayon pang giilugan diin tulo ka teams ang aduna pa’y poruhan sa No.2 nga puwesto nga sama sa No.1, adunay twiceto-beat nga benepisyo.

Gilauman nga mas kulbahinam ang inilugay sa nahabiling pito ka mga luna gumikan kay nahatagan og kahigayunan ang teams nga makapangandam og insakto.

Temporaryo unang hunongon ang mga kombati sa Commissioner’s Cup aron paghatag og agianan sa FIBA World Cup Asia qualifiers diin mopakita og aksyon ang Gilas Pilipinas. batok sa Chinese Taipei karong Hunyo 29 ug Australia Boomers karong Hulyo 2.

Ang Alaska Aces ug Talk N’ Text KaTropa, nga pulos adunay 3-3 nga rekord, lakip na ang Meralco Bolts, nga nakahuman na sa ilang tahas sa elimination dala ang 7-4 nga rekord, mao ang aduna’y poruhan nga makailog sa No.2 nga luna.

Hinuon ang Katropa gilaumang dili makapreparar og insakto kay kadaghanan sa ilang mga sinaligan nahilakip man sa puwersa sa Gilas. Nagsilbe kining sakripisyo alang kanila.

Kon pulos modaog ang Alaska ug Talk N’ Text sa tagsatagsa nila ka katapusang tahas, hayan mahitabo ang triple-tie sa 7-4 nga rekord kauban ang Meralco ug ning sitwasyuna, gamiton ang qoutient system sa pagbuak sa panagtabla.

Kon buot hunahuhaon, ang defending champions San Miguel Beermen, nga adunay 5-4 nga rekord, puwede pang makapugos og quadruple-tie sa 7-4 nga rekord kon modaog sila sa katapusan nilang duha ka mga tahas.

Hinuon nakuwenta nang daan nga wala na’y poruhan ang Beermen nga makailog sa No.2 nga luna bisan mahitabo pa ang quadruple-tie.

Grabe sab ang kisaw inig balik sa aksyon sa liga sa inilugay sa No.3 hangtod na sa No.8 nga luna tungod kay magbinirahay ang teams nga nangahilambigit sa usa’g usa paingon sa ubos.

Ang tanang teams maglikay nga mahiluna sa No.7 ug No.8 gumikan kay makigharong man kini og twice-to-beat nga kontra sa quarter-finals.

Ang laing mga sangka sa q-finals kombatihon pinaagi sa best-of-three series.

Mobalik ang aksyon sa torneyo karon pang Hulyo 4.