Bob Arum gi-TKO ni De La Hoya?
Daghan ang gibati og kabalaka sa dihang gianunsyo ni Bob Arum sa Top Rank Promotion ang iyang pagduda nga posibling dili mahinayon ang world title fight ni Manny Pacquiao ug Lucas Matthysse karong Hulyo 15 nga ipahigayon didto sa Kuala Lumpur, Malaysia.
Kini tungod kay ang kampo ni Pacquiao ug ang kasusyo niini sa Malaysia na-short sa ilang budget o pundo alang sa gastohan sa operation sa away.
Sa taho sa ESPN.com nga si si Pacquiao na short og $2 million ug gani wa pa kini makabayad og ensakto ngadto ni Matthysse bisan og humana ang deadline niini bisan ibutang kini sa screw hangtod sa away.
Ang Top Rank, bisan tuod og gitangtang ni Pacquiao isip iyang promoter, aduna gihapon kini papel sa maong away apan kutob na lang kini sa broadcasting right didto sa America.
Sa sayo ning buwana, duna na kini reklamo si Arum kalabot niini tungod kay wala pa usab siya makadawat og kuwarta nga iyang magasto.
Tungod niini, gipahibawo ni Arum nga aduna siyay Plan B inkaso og di gyud madayon ang maong away. Iyang giingon nga andam siyang mo-promote ni Matthysse nga makig-away ni Terrence Crawford. Sa ato pa, mawani si Pacquiao, ug buot ipasabot nga dili na siya interesado mo-promote sa Filipino boxing star.
Pero hugot kining gipanghimakak sa kampo ni Pacquiao. Si Mike Koncz, ang adviser ni Pacquiao, makusganong mipadayag nga mahinayon gyud ang away.
Sa pagkatinuod lang, kon si Koncz gani ang mosulti, magbaton kog pagduda niini kay duna na tay bating eksperiyensiya niining tawhana.
Nahinumdom mo sa iyang ipanghambog nga adto sa Middle East si Pacquiao moaway batok ni Amir Khan nga dili si Bob Arum ang promoter. Grabi niyang pasalig, apan nahitabo ba? Wa gyud intawon, kay way dagkong businessman nga nisalig kaniya.
Pero sa dihang si Oscar dela Hoya sa Golden Promotions nga mao usab ang promoter ni Matthysse, na ang mitingog sa niaging adlaw nga mahinayon ang maong away, 100 percent na ang akong patuo nga mahinayon gyud.
Gani matod ni de la Hoya nga aduna na siyay plane ticket alang sa maong away.
“We have a fight,” matod sa legendary nga de la Hoya. “I have my plane tickets already, so we’re ready to go,” ingon niya sa BoxingScene.com.
Mismong si Pacquiao miklaro nga wa siya magpadala sa mga negatibong taho ug hugot ang iyang training alang sa maong away, ug mao usab si Matthysse.
Ug ning bag-ohay lang, nagsugod na usab sa pagsulod ang mga commercials sa mga televisions didto sa Malaysia.
Apan ning bag-ong kalambuan, mora og gi-knockout si Arum ni de la Hoya kay mahulagway man nga igo ra diay siyang misuway pagpanglawgaw sa promotions.
Gusto niyang ipamatuod nga dili mahinayon ang mga dagkong away ni Pacquiao kon dili siya ang promoter.
Buot ba ipasabot nga niabot na gyud ang utlanan sa hataas nga panagkumboya ni Arum ug Pacquiao? Labing siguro, mao gyud ni sangputanan.
Some years back, ako nahinumdom nga aduna gusto na unta ni Pacquiao nga mobiya ni Arum apan wa matuohi ang iyang promotional contract sa Golden Boy tungod kay aduna pa siyay existing contract sa Top Rank, apan karon nga wala na, adiyos kanimo, Bob.