HARDEN MVP!
Midaog sa botasyon si James Harden sa Houston Rockets isip 2017-18 National Basketball Association (NBA) Most Valuable Player kagahapon sa NBA Awards Night sa Sta. Monica, California.
Gilupig ni Harden sa inilugay sa labing taas nga pasidungog ang ubang mga kandidato nga sila si LeBron James sa Cleveland Cavaliers ug Anthony Davis sa New Orleans Pelicans. Nakig-uban si Harden kang Chicago Bulls legend Michael Jordan sa listahan sa mga magduduwa nga nag-average og labing ubos 20 ka mga puntos, walo ka assists, lima ka rebounds ug 1.7 steals sa usa ka season. Gipangulohan ni Harden ang liga sa scoring, threepoint shooting ug padaghanay og 50 puntos o pataas sa usa ka duwa sa iyang pag-agak sa Rockets sa No.1 nga luna dala ang 65-17 nga rekord sa regular season.
Si James wala motambong sa Awards Night nga gipahigayon sa Barker Hangar sa Santa Monica Airport samtang padayon pang nag-alirong ang mga hugonhugon kon mobalhin ba siya o dili.
Si Harden, kinsa lumad nga taga Los Angeles, California, mihatod una sa iyang inahan sa entablado una niya gidawat ang MVP trophy gikan kang Commissioner Adam Silver.
“I’m not going to get emotional. She’s my backbone in good
times and bad times,” matod ni Harden kabahin sa iyang inahan.
Midaog isip Rookie of the Year mao si Ben Simmons sa Philadelphia 76ers.
Si Simmons nag-average og 15 puntos, walo ka rebounds ug walo sab ka assists diin iyang gikauban si Hall of Famer Oscar Robertson isip rookies nga mao ra’y nakaposte ning maong mga numero sa usa ka season.
Ang Australian pointguard nakatabang og dako sa 76ers aron makakulit og 52-30 nga rekord lakip na niini ang 16 ka sunodsunod nga kadaugan nga ilang namugna sa ulahing bahin sa regular season.
Nalupig ni Simmons sa inilugay ning maong pasidungog sila si Donovan Mitchell sa Utah Jazz ug Jayson Tatum sa Boston Celtics.
Midaog sa Most Improved
Player award mao si guard Victor Oladipo sa Indiana Pacers.
Nag-average si Olapido og 23.1 puntos sa labing una niyang season sa Pacers nga nagtukmod kaniya aron mahihong All-Star. Si Olapido sab ang nag-una sa steals sa labing unang higayon.
Ang miangkon sa Defensive Player of the Year award mao si Rudy Gobert sa Utah Jazz. Si Gobert maoy nag-una sa
mga nangapili alang sa All-Defensive first team.
Nakaluha sa Sixth Man award mao si Lou Williams sa Los Angeles Clippers.
Ang naggiya sa Toronto Raptors nga si Dwane Casey maoy midaog sa Coach of the Year award.
Sa miaging buwan, gitaktak sa Raptors si Casey gumikan sa kapakyasan niini nga mahatod ang Raptors sa finals. Si Casey gikuha sa Detriot Pistons isip bag-ong coach. “Can’t look in the rear view mirror,” matod ni Casey. “Winston Churchill said success is measured by failure, failure, and then come back with enthusiasm, and that’s what I’ve done.”
Nalupig ni Casey sila si utah coach Quin Snyder ug Boston coach Brad Stevens.
Naagak ni Casey ang Raptors sa No.1 nga luna sa Eastern Conference.
Apan sa 2nd round sa playoffs, gipakauwawan na sab sila sa Cavaliers nga ningposte og dominanteng 4-0 nga kadaugan sa series.