Sayang ang career ni Dumpit

Mas daghang mga pangutana, gumunhap ug tanghaga ang naglimen niining kamatayon sa kontrobersiyal nga pulis nga si SPO1 Adonis Dumpit sa mga kamot sa iyang kaubanang law enforcers. Si Dumpit napatay sa mga sakop sa hini-usang puwersa sa National Bureau of Investigation (NBI) ug sa Regional Intelligence Division sa PRO 7 atol sa usa “legitimate” operation niadtong Miyerkules sa buntag sa Tagbilaran City, Bohol.

Dugay-dugay nang nadestino si Dumpit sa Bohol Provincial Police Office gikan sa Cebu City Police diin nahimo siyang usa sa mga close in security sa “kanhi laos nga pulitiko.” Nahimong popular si Dumpit ug nakapakurog ang iyang pangalan sa criminal elements dinhi sa dakbayan. Daghan na siya og nadakpan ug napatay nga mga notadong kriminal. Naputol ang iyang pagserbisyo human siya mapriso gumikan sa iyang pagpusil patay sa usa ka notadong tulisan nga menor edad nga si Ronron Go. Natanggong siya sa Cebu City Jail ug nadala sa Leyte Sub-penitentiary sa Abuyog, Leyte. Apan gitugutan nga makapiyansa.

Kon atong tuhuan ang version sa taga NBI Bohol nga dugay na nilang gipa-ubos sa surveillance si Dumpit human sila makadawat og taho nga nahilambigit kini sa illegal drugtrade isip pusher ug protektor, may rason siyang likidahon. Apan ang suod nga mga higala ni Dumpit dili makatuo ning pasangil. Pero imposible usab nga mo-operate ang NBI ug RID batok ni Dumpit kon way igong basihanan.

Ang live in partner ni Dumpit nga si Maria Ella Amores nagkanayon nga sa paggawas ni Dumpit gikan sa ilang balay sakay sa iyang motorsiklo, diha siyay nakita nga puti nga SUV nga misunod kaniya ug laing blue nga van ang nibabag sa kalsada ug dayong buto-buto. Matod ni Atty. Renan Oliva, chief sa NBI Bohol, nga ila lang untang dakpon si Dumpit apan mibunot sa iyang armas mao nga ila na lang gibirahan. Patay kini diha-diha dayon.

Aduna kahay nagmando sa NBI ug RID nga ipapatay si Dumpit? Tipik ug kabahin kaha kini gihapon sa internal cleansing sa PNP?