Duterte ug ang Bibliya
Daghang nakasaway kang Presidente Rodrigo Duterte tungod sa iyang paghubad sa nahasulat sa Bibliya kalabut sa pagtintal sa usa ka bitin kang Eva ug Adan diin iyang gisaway ang Diyos.
Bisan si Senador Ping Lacson nga nagpaluyo kang Duterte nakasaway sa iyang komentaryo batok sa Diyos. Ang Malacañang nanalipud hinuon sa presidente kay mao kuno kini ang pagsabut sa presidente og di na kinahanglang dakuon pa. Apan bisan ang ubang mga dumadapig ni Duterte wala maka-uyon sa gipahayag niini. Nasayud kita nga nasuko siya sa ubang mga pari sa relihiyong Katoliko apan dili unta niya iapil ang Labaw’ng Makagagahum. Atong huwat on og unsay reaksiyon sa katawhan niini basi sa survey nga himuon unya sa Social Weather Stations (SWS) ug Pulse Asia.
○○○
Sa pulitika, nagsugod na paglutaw ang tinuod nga baruganan ni Kong. Jonas Cortes nga atong gitag-an nga buot mobalik sa Mandaue City hall. Nakita kini sa dihang naglain siya kang Mayor Luigi Quisumbing sa pagpapanumpa sa 14 ka mga napiling barangay kapitan. Gani nasakitan niini ang mayor kay wala man lang gani siya imbitaha ni Cortes. Abli usab ang kanhi mayor nga makig-atbang kang Quisumbing. Duna nay tabi-tabi nga si kanhi Konsehal Lollipop Ouano maoy himuong bise ni Luigi samtang si businessman Glen Soco maoy himuong running mate ni Jonas. Apan di pa masiguro kon magbise ba lang si Lollipop o modagan ba kini aron mahimong three-cornered fight ang pagka-mayor sa Mandaue City. Si Bise Mayor Carlo Fortuna gituhoang modagan pagka-kongresista puli kang Cortes.
Sa Cebu City, morag gipul-an na si Presidential Assis- tant for the Visayas Sec. Mike Dino niining pamugos ni kanhi mayor Mike Rama nga siya gayud maoy modagan s pagka-mayor ug bise lang gihapon si Vice Mayor Edgar Labella. Sa dihang akong gipangutana kon unsay iyang buhaton aron masulbad kining maong sitwasyon mitubag si Sec. Dino sa akong text message nga pasagdan na lang niya nga magsabut ang duha. Kon mao kini, dili ako mahibung nga mosugot nalang si Labella nga magbise kang Rama. Ato kining masayran karong katapusan sa buwan. Ako usab nga gisusi gikan kang Sec. Dino kon iya bang kumbinsihon si world-renowned designer Kenneth Cobonpue aron modagan pagka-mayor. Mitubag siya nga mas magubot na gayud unya ang oposisyon kon naa pay laing mokandidato pagka-mayor.
Sa laing bahin, si Tuburan Mayor Aljun Diamante buot usab modagan pagka-kongresista sa 3rd district batok sa kanhi representante sa maong distrito Pablo John Garcia. Apan kon apiki alang kaniya ang pagpakigbatok kang Pablo John, modagan siya pagka-bise sa iyang igsuon nga maoy mopui kaniya sa pagkamayor sa Tuburan. Sa Danao City nga gidominar sa pamilya ni Mayor Ramonito Durano gihulga sa gihugonhugon nga pagkandidato pagka-mayor ni Paolo Duterte, anak ni Pres. Duterte. Nahi-ubos man gud kuno si Duterte sa gihimo ni Durano batok sa mga Digong supporters niadtong miaging presidential election.