Giukoy ni Manoy

Dear Papa Joe,

Tawga lang ko sa ngalan nga Edward, taga Leyte pero kasamtangang nagpuyo sa Talisay.

Nag trabaho ko sa usa ka factory sa Lapu-Lapu ug dinhi ko nahimamat ang akong hinigugma nga si Lorna. Tulo lang ka buwan ang among relasyon dihang nakadesider mi nga mag-live in. Sukad naa nay nahitabo namo ug syempre as lalake, ganahan sad kaayo kay naay nakakadulog permi. Mao to nga nagtipon mi ug nangipon ra mi sa akong igsuon nga pulis. Kay ulitawo paman sad siya ug permi wala sa balay kay ma-assign sa lagyo.

Unsa ba nga usa ka adlaw niana, nisayo mi og uli kay naguba ang makinarya sa among factory, pag-abot pa nako sa amo naka-lock man ang pultahan. Pero naa koy madungog nga kasikas gamay sa sud. Wa ko masayop, tingog nga pinugngan akong nadungog sa sulod sa amo. Gilili dayon nako ang mga gilhang sa plywood nga maoy bongbong. Didto nako nakita ang akong maguwang ug akong ka live in nga naghilawas.

Wala ko masayud sa akong buhaton. Love nako akong ka live in ug love sad nako akong kuya. Wala sila kahibawo nga nasayud ko sa ilang gibuhat kay wa man ko magsulti o gasige gihapon ni sila samtang nagtrabaho ko. Tambagi ko unsay akong buhaton.

EDWARD Edward,

Mas maayo nga sultihan nimo sila sa tinuod kay luoy sad kaayo ka anang kahimtanga. Basin og maburos, ikaw pa ang pasanginlan. Dako nag epekto sad sa imong trabaho kay mawa ka sa focus.

Mas maayo nga inig kahuman nimo og istorya, makigbuwag ka ug mas maayo molahi ka kay traydor ang imong maguwang. Bisan pa kon ang babaye pa ang nanghagad, angay siyang molikay kay igsuon mo. Usa pa, wa say ayo ang babaye nga wa say respito.

PAPA JOE

(sa inyong tampo ipadala lang sa papajoesuperb@ gmail.com)