Neither one of us
Naniga ang among mga mata ni Bonna. Kinsa man say di makugang? Tiaw moy ang lalaki nga miduol kang Rommel mikupot sa bukton sa lalaki nga among gikaibgan ni Bonna?
Mora mig nangluspad si Bonna nga nagkatinan-away og dugay labi na kay ang lalaki nga mikupot sa bukton ni Rommel pinaikid ang sampot nga naglakaw? Ngano ba sab, uy, nga nahitabo man ni? Dunay uyab si Rommel ug bayot pa gyud? “Ngeee! Kaluod?” Nakapanglingo si Bonna nga nakigpangagda nako sa pagpamauli na. Nakapanakla ko sa akong nasaksihan. Nakapangawot ko sa akong ulo samtang nagtan-aw kang Rommel ug sa kaubang bayot nga nanulod sa Mall. “Tana, Bon.”
Gusto kong mosinggit sa kalagot. Apan nagpugong lang gyud ko sa akong kaugalingon. Kinsa man say malipay? Puwerte nakong pangandoy nga mahimong boyfriend si Rommel. Luod gyud tinuod.
Kaguwapo niya unya nagmantinil lag bayot? Morag nainsulto ang among beauty ni Bonna. “Lupig man lang tag bayot ani, Mayeen.”
“Bitaw. Unya, magpadayon gihapon ka sa paghigugma kang Rommel, Bon?”
“Di na, uy. Naay daghang nangulitawo nako. Mamili na lang ko nila.”
“Ako sab dunay mga suitors. Pero naglisod kog pili nila kay wa man koy nagustohan? Aw, pulos ko na diay sila gi-basted.”
“Wa gyuy usa nato nga nakaangkon kang Rommel, Mayeen.”
“Mao gyud. Kalimtan na lang nato siya, Bon.”
Sa akong paghigda anang pagka gabii, gusto kong kalimtan si Rommel. Apan mahunahuna gyud nako siya. Ngano ba sab, uy, nga siya pa man ang gipitik sa akong kasingkasing? Kadaghan man untang lalaki ning kalibutana?
Pagkasunod adlaw, gikasugat namo ni Bonna si Rommel sa usa ka lugar sa Colon. Gikan mi sa eskol si Bonna. Ingon man gyud mi aning duha, di molargo sa pagpauli kay hapon pa man ang last subject namo. Giyam-iran ko si Rommel. Mao sab si Bonna, pinataas ang agtang nga nangyamiid kang Rommel.
“Hi! Girls!” Wa ko motan-aw kang Rommel nga nag-smile nga mitagad namo. Wa sab tagda ni Bonna si Romme. Gikuptan ko ni Bonna sa kamot ug iya kong gibitad aron mahilayo mi kang Rommel. Unya usa ka bayot ang misugat kang Rommel.
“Hi, Cousin!” Nagkatinan-away mi si Bonna. Ig-agaw ni Rommel ang maong bayot?
(SUMPAYAN)