SAN FRAN 2-0 NA; ‘LACION DAOG SAB

Girehistro sa San Francisco ang ilang ikaduhang kadaugan sa semifinals round pinaagi sa makutas nga pagpukan sa Medellin team, 77-74, sa 2nd Cebu Governor’s Cup Inter-cities/Municipalities 21-under basketball tournament nga gipahigayon sa Mandaue City Cultural Center and Sports Complex niadtong Miyerkules sa gabii.

Sa gihapon, ang ilang star player nga si Kenny Rogers Rocacurva mipabuhagay og 27 puntos, lakip na niini ang iyang free throw ug ang coastto-coast play sa himatyong segundos nga maoy nakapadaog ug naghatod sa ilang sunodsunod nga daog sa semis.

Naglabaw ang San Francisco, 69-65, apan ang 7-2 nga rally nga giduslitan sa tres ni Kyle Lim ug sa layup ni Gelmart Ompad maoy naghatag sa Medellin og 72-70 nga labaw, 1:14 segundos ang nahabilin sa duwa.

Nag-ungaw na unta sa kapildihan ang San Francisco sa dihang milabaw ang Medellin, 74-72, sa layup ni Gelmart Ompad sa katapusang 1:14 sa fourth quarter.

Apan ning higayona, dala ang dakong pagsalig, inusarang giatake ug gibuak ni Rocacurva ang depensa sa Medellin aron paglansang sa 2-0 nga baraha sa semis.

Si Fritz Saladaga nangulo sa Medellin nga may 22 puntos samtang midugang og tag 11 puntos sila si John Riel Booc ug Riel Velosa.

Sa sayo pa, ang defending North Division champion Consolacion Sarok Weavers nga napildi sa Medellin niadtong Martes, mibangon og misungag sa Bantayan, 98-82.

Wala magpatandog sa ilang kapildihan sa opening game sa semifinals, ang Consolacion mikontrolar sa duwa gikan sa sinugdanan hangtod sa katapusan.

Si Emman Villamor mitali og 28 puntos, 23 puntos gikan ni Patrick Montano ug laing tag 11 puntos sila si LA Casinillo ug Gonzaga alang sa kadaugan sa Sarok Waivers.

Ikasangka sa Consolacion (1-1) ang San Francisco (20) sa katapusang adlaw sa semis nga padayong giduwa kagabii aron pagdeterminar kon kinsa ang mag-abot sa best-of-three Division Finals. Sa kasamtangan standing sa matag team, posibling adunay mahitabong triple-tie.

Samtang ugmang adlawa, sugdan na ang best-of-three South Divison finals tali sa Talisay City Aqua Stars ug Sibong diha sa Talisay City Sports Complex.

/ TAMPO NGA HULAGWAY ■ BUZZER BEATER: Si LA Casinillo, wala, usa sa mga sinaligan sa Consolacion Sarok Waivers, ang mipabuhagay og usa ka buzzer-beating shot niining aktoha atol sa ilang duwa batok sa Bantayan Island sa semifinals round sa 2nd Governor’s Cup...