ADIYOS, GERMANY!

Gitaktak sa South Korea, 2-0

Gipakaging ug gipalagpot sa South Korea ang defending

champion Germany, 2-0, niadtong Miyerkules sa ilang Group F match sa 2018 soccer World Cup didto sa Kazan, Russia.

Ang Koreanong si Kim Young-gwon maoy unang naka-goal human sa video review samtang gidugangan kini ni Son Heung-min og laing goal pipila na lang ka gutlo sa wa pa motingog ang final buzzer.

Ang kaupat na makampiyon nga Germany kinsa wala gyud ma eliminate sa World Cup sukad pa niadtong 1938, wa makapakita sa ilang kalantip sanglit duha lang ka goals ang ilang nahimo sa ilang tulo ka duwa sa ilang grupo diin usa ra usab ang ilang daog.

Usa sa mga nakitang rason

sa bati nga performance sa defending champion mao ang sobrang kompiyansa sa ilang

coach Joachim Loew sa pag-atender sa team ug ingon man pipila ka mga kasaypanan sa iyang pagpili og mga players nga molangkob sa team.

Naobserbahan mao ang wa pagkalakip sa lineup sa batan-on nga si Leroy Sane, gihulagway nga usa sa pinakamaayong German player sa iyang henerasyon, samtang iyang gisulod sa lineup ang kulang sa kondisyon nga sila si Sami Khedira ug Masut Ozil.

Sa ilang mga friendly games, ang Germans igo rang nakatabla sa England, France ug Spain sa wa pa nila mapildi ang Brazil niadtong Marso.

Napildi sila sa Austria ug muna sa ginhawa nilang napukan ang Saudi Arabia dayon na

nilang gikan paingon sa Russia.

Taliwala sa ilang nasinati, si coach Loew masaligon nga makapakita og saktong labok ang iyang lineup sa higayon nga atoa na kini sa Russia.

Apan sukwahi sa ilang pasalig, ang Germany sayo nga nanamilit, butang nga nakapakugang sa tibuok kalibutan.

“It was a bit of over-confidence ahead of our opener against Mexico,” matod ni

Loew. “We thought we could just press the button and win. That was not the case.”

Dunay kontrata pa si coach Loew nga molungtad hangtod sa 2022 apan posibling mapulihan kini.

Sa laing duwa, gisiruhan usab sa Brazil ang Serbia, 2-0, sa Group E.

Sila si Paulinho ug Thiago Silva maoy naghatag og kadaugan sa Brazil kinsa gikatakdang makigsangka sa Mexico sa second round.

Ang kadaugan naghatag sa Brazil og siete puntos aron pangulohan ang ilang Grupo ug ilang ikaharong ang Sweden sa Top 16. Nagsunod kanila ang Switzerland nga may singko puntos.

Ang Serbia ug ang Costa Rica maoy nangataktak sa ilang grupo.

/ AP ■ BYE: Si Thomas Mueller sa defending champion Germany nga wa makapugong sa lugmaw sa iyang mga luha human sa wala damha nilang sayo nga pagkataktak sa 2018 soccer World Cup sa dihang napukan sila sa South Korea, 2-0, sa niaging gabii sa Kazan Arena sa Russia.