Krusyal nga engkuwentro
Mga duwa karon 2:00 pm- CEC
batok CITU ( jrs) 3:30 pm- UC
batok USPF (srs) 5:00 pm- USJR
batok SWU (srs)
Mosagubang dayon og krusyal nga kombati ang University of Cebu (UC) Webmasters sa ilang pagbalik og duwa karong hapon sa Cebu Schools Athletic Foundation Inc. (CESAFI) 2018 Partner’s Cup college division sa Cebu Coliseum.
Ang Webmasters, nga gikan sa ilang kampanya sa Mayor Kim Lope A. Asis 2018 Collegiate Invitational Basketball Tournament sa miaging gabii sa Bayugan City, Agusan del Sur diin naangkon nila ang ikaduhang luna, makigbatok sa University of Southern Philippines Foundation Inc. (USPF) Panthers sa ikaduhang duwa karong hapon.
Ang Webmasters, nga adunay 4-0 nga rekord, ug Panthers, nga adunay 3-1 nga baraha, nahilakip sa tulo na lang ka teams nga nag-ilog og puwesto sa finals kauban ang University of the Visayas (UV) Green Lancers.
Kon mapilde ang Panthers batok sa Webmasters, hayan segurado nang magparang ang Webmasters ug Green Lancers sa finals.
Apan kon modaog ang Panthers, hayan komplikado pa ang sitwasyon ug magpabiling abli ang inilugay sa duha ka lingkuranan sa finals.
Sa main game, magsangka ang University of San Jose Recoletos (USJ-R) Jaguars batok Southwestern University (SWU) Cobras sa laing sangka sa college division.
Ang Jaguars ug Cobras parehong naggunit og 1-3 nga rekord. Pareha pa silang adunay poruhan alang sa inilugay sa ikatulong luna.
Sa nag-inusarang duwa sa high school division, magkombati ang pulos nagsalimoang nga Cebu Eastern College (CEC) Dragons (1-4) ug Cebu Institute of Technology University (CITU) Wildkittens (0-4) sa premirong duwa.