UC VS. UV SA PARTNER’S CUP FINALS PREVIEW
Mga duwa karon
5:15 pm- USPF batok USJ-R ( jrs)
6:45 pm- UV batok UC (srs)
Magparang ang mga lider sa college division nga mao ang University of the Visayas (UV) Green Lancers ug University of Cebu (UC) Webmasters sa main game karong gabii sa Cebu Schools Athletic Foundation Inc. (CESAFI) 2018
Partner’s Cup sa Cebu Coliseum.
Magsilbe na kining preview alang sa championship series gumikan kay nahiluna na mang daan sa finals ang duha ka mga kampo nga pulos adunay 5-0 nga rekord.
Bisa’g unsa pa resulta ning sangkaa, dili na kini makaapekto alang sa duha ka mga kampo apan labing seguro, ang modaog makabaton og
psychological advantage sa umaabot nga finals.
Dili ikalimod nga inilog ang Green Lancers ni coach Gary Cortes ning sangkaa apan dili sila angayang molugak bisan gamay sa Webmasters ni coach Raul “Yayoy” Alcoseba nga gikonsiderar nga usa sab ka title contender.
Sa nag-una nilang lima ka mga tahas, pulos gipangkastigo sa Green Lancers ang ilang mga nakontra diin nag-average og 19.4 puntos ang ilang malabaw.
Ang Webmasters ningposte sab og dagkong kadaugan batok sa tulo nila ka nangaging mga kontra apan duha ang nakapanghudlat kanila.
Nag-average og 12.8 puntos ang mga labaw sa Webmasters sa ilang lima ka mga daog.
Sa premirong duwa, magsangka ang University of San Jose Recoletos (USJ-R) Baby Jaguars ug University of Southern Philippines Founda- tion (USPF) Baby Panthers sa high school division.
Ang Baby Panthers adunay 4-1 nga rekord samtang ang Baby Jaguars naghupot og 2-3 nga baraha.
Grabe ka importante kining duwaa alang sa duha ka mga kampo.
Ang kadaugan sa Panthers maoy makahatag kabila og seguradong luna sa finals samtang ang kadaugan sa Baby Jaguars makapaseguro kanila’g puwesto sa inilugay sa ikatulong dapit.
Kon mapilde ang Baby Panthers, delikado pang modakin-as sa ilang mga kamot ang luna sa finals ug mailog kini sa UV Baby Green Lancers (3-1) ug UC Baby Webmasters (4-1).
Kon mapilde sab ang Baby Jaguars, posible sab silang mawagtang sa esena sa inilugay sa ikatulong luna./ESL