MGA MAYOR GIPANGPASIDAN-AN
Mga mayor sa Sugbo nga may mga kontra sa politika o gilambigit sa ilegal nga drugas, gitambagan nga hingusgan ang ilang seguridad ug magmabinantayon sa kanunay.
Kini human usab sa nahitabong pagpatay sa mayor sa Tanauan City, Batangas, atol sa flag-raising ceremony sa City Hall kagahapon.
Samtang Gob. Hilario Davide naglibog nganong nagkadaghan ang gipamatay nga mga opisyal sa gobiyerno.
Nitambong sa tigum sa Regional Peace and Order Council (RPOC) 7 meeting ang pangulo sa League of Municipalities in the Philippines (LMP) Cebu Chapter nga si Tuburan Mayor Democrito Diamante.
Si Diamante nga nahibalo sa gidangatan sa mayor sa Tanauan City, Batangas nga si Antonio Halili, miingon nga dili angayang mokompiyansa ang mga mayor ug kinahanglang magmabinantayon sa kanunay.
Sa nasayran, gipusil usa ka giingong sniper si Halili samtang nagkanta sa Lupang Hinirang atol sa flag-raising ceremony sa ilang City Hall kagahapon sa buntag.
Si Halili naila sa iyang gipatuman nga shame campaign batok sa mga drug suspect apan giingong anaa siya sa narco list sa president.
Matod ni Diamante nga kon dunay kaugalingong close-in security ang mga mayor, mas maayo usab nga mas pahugtan pa kini, ilabi na kon duna silay hugot nga kaatbang sa politika o kaha nahilambigit sila sa ilegal nga mga kalihukan sama sa drugas.
Si Gob. Davide, nga maoy chairman sa RPOC sa Central Visayas, naglibog kon nganong nagkadaghan na karon ang mga opisyal nga gipamatay.
Wa masayod ang gobernador sa motibo sa mga pagpamatay apan alang niya, dili layo nga may kalambigitan na usab kini sa ilegal nga drugas.
“Makapaminsar ta oy ug nganong nahitabo ni,” niingon si Davide.