50 ang mga milyonaryong pulis sa CV
Dunay mga pulis nga milyonaryo dinhi sa Central Visayas, apan sa pakisusi sa Police Regional Office (PRO) 7, limpyo ang ilang records.
Dagko na silag sweldo subay sa ilang umento sa suhulan sa PNP, apan base sab sa Statement of Assets, Liabilities and Net worth (SALN) sa Police Regional Office (PRO7), 50 ka mga pulis nga nagranggo og PO1 ngadto sa superintendent milyonaryo.
Kini maoy gibutyag ni Chief Inspector Jose Gesto, chief sa Personnel Records Management Section ug sa SALN ubos sa buhatan sa Regional Human Resource and Development Division (RHRDD-7) sa Police Regional Office (PRO-7).
Giklaro niya nga ang 50 ka mga pulis nga milyunaryo limpyo pulos ang ilang records, legitimate ang ilang negosyo ug ang uban niiini dato na ug maayo ang dagan sa negusyo sa ilang pamilya sa wa pa sila mosukod sa serbisyo sa PNP.
Nagdumili siya sa pagbutyag sa mga ngalan sa maong mga pulis sanglit confidential kini ug ang nakuha nilang figure sa mga milyunaryo basi sa ilang latest nga gisumiter nga SALN.
Si Supt. Reyman Tolentin, tigpamaba sa PRO 7 nga nahinabi sa dySS Super Radyo Cebu ug Superbalita Cebu, niingon nga siya nalipay nga dunay mga pulis nga milyunaryo dinhi sa Central Visayas.
Sumala pa niini nga nagpakita kini nga dunay mga pulis nga naningkamot, nagkugi ug maayo sa ilang financial management.
Way angay kabalak-an ang mga pulis nga namilyunaryo kon wa silay illegal nga kalihukan ug legitimate ang ilang napundar nga networth.
Giklaro niya nga confidential ang ilang records sama sa SALN.
Mamahimo lang malili kon ipaubos sa imbestigasyon sa Ombudsman ug sama kang kanhi PNP Director General Alla Purisima.
Samtang giklaro niya nga duna say nagmonitor nila nga mga sakop sa Counter Intelligence Task Force CITF-PNP pagsuta kon ang income sa usa ka pulis mosibo sa iyang mga kabtangan ug negusyo.
Sanglit ilang sweldo gikuhaan na daan og tax sa witholding gikan sa Camp Crame.
Kon masuta sa lifestyle check nga di mosibo sa iyang income, tataw nga ill-gotten wealth.
Apan kini karon mga nabutang nga 50 ka mga milyunaryong PNP dinhi sa PRO-7 nga gilangkuban sa Cebu, Bohol, Negros og Siquijor, gamay ra nga percentage sanglit moabot sila dinhi sa og 9,000 ka personnel sa Central Visayas.
“Aw ako nakalimot nako pila ang akoang networth, pero nahinumdum ko naabot milyon akong utang. Pobre gihapon,”dugang ni Tolentin.
Gitug-an ni Tolentin nga sa iyang bahin nakatigom siya dihang nakaserbisyo siya sa United Nations (UN).
Gawas niini dako na ilang sweldo ug kon sila mo-loan sa PNP, ang nagranggo og fullfledged colonel tugutan sa P1.5 milyon nga bayran sulod sa lima ka tuig ang maximum.