Assignments sa weekend gidili: DepEd

Gipahinumduman sa Department of Education (DepEd) 7 ang tanang mga magtutudlo sa elementarya ug hayskul nga di mohatag og assignment sa mga tinun-an sa Biyernes o sa panahon sa weekend, kun Sabado ug Dominggo.

Matod sa tigpamaba sa DepEd 7, Amaryllis Villarmia, anaa sa mandato sa DepEd ubos sa DepEd Memo 392 nga di hatagan ang mga estudyante og bisan unsa nga assignment o homework sa Sabado ug Dominggo.

“The memo intends to give pupils an opportunity to enjoy their childhood and spend quality time with their parents without being burdened by the thought of doing lots of homework,” matod ni Villarmia.

Dugang niya nga ang maong memo pinirmahan kaniadto Ni DepEd Secretary Armin Luistro sa 2010.

Ang memo giisyu human aduna’y daghang reklamo nga nadawat ang DepEd gikan sa mga ginikanan tungod sa kadaghan sa assignment sa panahon sa weekend diin di na maka-bonding o enjoy ang bata kauban ang ilang pamilya.

Subay sa maong memo, gitambagan usab ang mga magtutudlo nga limitahan ang assignment nga ilang ihatag sa mga tinun-an nila aron makapahuway pa ang bata ineg uli nila sa ilang panimalay. “There are two main purposes for assignments, to review previews lessons or to get ready for a new one. If it has a good intention, then we might reconsider,” si Villarmia nagkanayon.

Sa pagkakaron, wa pa sila’y nadawat nga reklamo gikan sa mga ginikanan batok mga magtutudlo nga daghan og gihatag nga assignment sa ilang tinun-an

Gidasig hinuon niini ang mga ginikanan nga moreklamo kon aduna’y masugatan nga ingon niini.