MGA MAYOR HATAGAN OG SECURITY SA CPPO
Gibutyag ni Department of Interior and Local Government (DILG) 7 regional director Rene Burdeos nga aduna nay mga mayor sa Central Visayas nga nipadayag sa ilang kabalaka kabahin sa sunod-sunod nga pagpamusil patay sa mga mayor sa nasod.
Usa sa mga nipadayag sa kabalaka si Lapu-Lapu City Mayor Paz Radaza.
Si Burdeos atol sa iyang uwahing Regional Peace and Order Council (RPOC) 7 meeting nagkanayon nga usa sa nahisgutan sa mga mayor ang pagpamusil patay sa mga mayor.
Dugang niya nga di mawagtang ang kabalaka tungod kay bisan siya kaniadto dihang adunay mga director sa DILG ang gipamusil patay, nabalaka usab.
“Wa ta kahibalo sa motive ba, bisag wala tay atraso,” matod ni Burdeos.
Si Burdeos kinsa hingpit na nga niretiro kagahapon, nagkanayon nga kon gusto sa usa ka mayor nga magdungag og security personnel, mamahimo kini nga mo-request sa Police Regional Office (PRO) 7.
Apan kadtong mga gitangtangan og police powers sa National Police Commission mamahimo nga mokuha og personal nga security ingon man maghupot og armas apan kinahanglan nga anaay lisensya nga permit to carry firearms.
Hinuon, way nibutyag niya nga mayor nga nakadawat og death threats tungod kay sa kapulisan kini ug kinahanglan nga moduol aron matabangan.
NABALAKA
Si Radaza niangkon nga human siya makadungog sa pagpatay sa mga mayor sa Tanauan City, Batangas Antonio Halili ug Mayor Ferdinand Bote sa Nueva Ecija sud ning semanaha, nakuyawan siya.
“Kanang at first when I’ve heard about it, na morag gikuyawan. But I don’t think those killings has been done without reason,” pamahayag ni Radaza atol sa regular press conference.
Nagtuo si Radaza nga adunay nagpaluyo nga bug-at nga motibo sa pagpatay sa duha ka mayor, susama ni Halili nga gilambigit sa illegal drugs apan gipanghimakak sa kabanay niini sanglit sila nagtuo nga adunay naligsan ang mayor sa iyang hugot nga kampaniya batok sa drugas.
Sumala pa sa opisyal nga masayran ra ang tanan ilabi na sa motibo sa pagpatay nila ni Halili ug Bote.
“A little bit gi-tightened ang security,” butyag ni Radaza.
Gawas kang Radaza, si Tuburan Mayor Democrito “Aljun” Diamante, presidente sa League of the Municipalities in the Philippines Cebu Chapter, nahadlok na.
MOHATAG
Ang Cebu Provincial Police Office (CPPO) andam nga mohatag og security sa mga mayor nga nabalaka sa ilang kinabuhi.
Matod ni P/SSupt. Manuel Abrugena, hepe sa CPPO, nga kon adunay nadawat nga hulga sa kinabuhi ang mga mayor sa lalawigan sa Sugbo, mahimong modangop sila sa kapulisan aron mapaubos dayon sa imbestigasyon o threat assessment.
Wa pa hinuoy midangop sa CPPO nga mga mayor sa kalungsoran nga nangayog abag sa kapulisan tungod kay adunay hulga sa kinabuhi.
Apan mipasalig siya sa mga mayor nga kon wa lang kini ilegal nga kalihukan, di sila angay nga mahadlok sanglit kasagaran sa mga nangamatay mao kadtong nalambigit sa ilegal nga drugas.
“Wala po tayong dapat ipangamba if ever na ang certain individuals po ay wala naman pong ginagawang masama. Kung sakaling may threat tungkol sa business rivalries, because of politics, we are more than willing naman po kami na mag provide,” matod ni Abrugena.
Dinhi sa Sugbo bugtong si Daanbantayan Mayor Vicente Loot lang ang nanganlan ni President Rodrigo Duterte nga giingong nalambigit sa illegal nga drugas sa Eastern ug Central visayas apan gipanghimakak kini sa mayor.
Si Loot gi-ambush na pipila ka buwan ang nakalabay, apan wa maunsa.
Matod ni Abrugena nga wa pa moduol kanila si Loot aron mangayog abag nga mahatagan og siguridad.
Gipanghimakak hinuon sa police opisyal nga police ra usab ang responsabli sa sunodsunod nga mga pagpamatay sa nasud sanglit daghan ang mga anggulo nganong sila gipangpusil.