Drug test gihimo sa mga pulis nga nadestino sa kampo sa CPPO

Gipaubos sa kinalit nga drug test ang mga pulis nga nadestino sa kampo sa Cebu Provincial Police Office (CPPO).

Kini kabahin sa programa nga gipatuman ni Police Regional Office 7 director Debold Sinas nga internal cleansing.

Giuna sa pag-drug test ang mga pulis nga sakop sa Drug Enforcement Unit sa kampo, lakip na kadtong nadestino sa mga police station.

Matod ni P/SSupt. Manuel Abrugena nga kon adunay mag positibo sa paggamit sa ilegal nga drugas, molusad dayon sila og imbestigasyon ug diha-diha dayon iduso nila ang dokumento ngadto sa Provincial Internal Affairs Service.

Wa na tahasi sa PRO 7 ang Regional Investigation and Detective Management Division nga mogunit sa kaso sa mga pulis nga nagpositibo sa paggamit sa ilegal nga drugas aron madali pagpalagpot sa serbisyo sa maong mga pulis.

Niadtong miaging buwan, dunay duha ka mga personnel sa CPPO ang nagpositibo sa confirmatory test sa Camp Crame nga karon naa na sa RIAS 7 nga nag-atubang og dismissal proceedings.

Giuna ni Abrugena ang iyang mga intelligence officers aron masiguro nga way naggamitan sa ilegal nga drugas.

“We did this because of the serious effort ng ating regional director na we have to continously na maipatupad ang internal cleansing,” matod ni Abrugena.

Samtang nigawas na usab ang confirmatory test sa usa ka pulis nga nag positibo sa drug test nga gihimo sa PRO-7 niadtong miaging buwan.

Matod ni Sinas nga ang maong pulis nadestino sa Regional Personnel Holding and Accounting Unit 7 nga iyang giila nga si PO1 Castro Garcia nga bag-o lang nakasud sa serbisyo sa PNP.

Nagnegatibo hinuon sa paggamit sa drugas kadtong mikaratil pag dagan atol sa drug test apan di pa makalingkawas sanglit ipa-monitor kini ni Sinas.