Tag-iya sa bangka nga nalunod, gibuhian
Gibuhian na sa Alegria police station ang tag-iya motorbanca nga natikyaob sa kadagatan sa barangay Madridejos, lungsod sa Alegria, niadtong Miyerkules sa hapon, diin nikalas og tulo ka kinabuhi.
Si Alberto Lopez wa pasakai og kaso sa kabanay sa nangamatay sanglit ila ra usab ning kaila, kinsa ang usa sa nakalas igsuon ra usab niini.
Matod ni Cebu Provincial Police Office (CPPO) Director Senior Supt. Manuel Abrugena nga kon makahukom ang pamilya nga mopasaka silag kasong reckless imprudence resulting in multiple homicide bisan kon nakagawas na si Alberto, mahimo pa gihapon nila nga ipasaka sa korte.
“We cannot do anything but to release yung pump boat driver as of now. Ngayon in the long run, makapag isip ang family that they will be filing a case, then I direct, file na natin,” matod ni Abrugena.
Nakadayeg usab, matod pa, ang kabanay kang Alberto sanglit wa ni mobiya sa iyang mga pasahero.
Gani, unom ka mga menor de edad ang iyang natabang samtang ang uban nga kahibawo molangoy naluwas usab.
Malipayon pa nga nanakay sa usa ka motorbanca ang 15 ka mga tawo diin kasagaran kanila mga menor de edad gikan sa Barangay Santa Filomena aron magsuroysuroy.
Apan sa pag-abot sa Barangay Madridejos, kalit lang napawong ang makina sa bangka ug naatol pa nga mikusog ang bawod.
Si Alberto Lopez nisuway sa pagpadaplin sa bangka pinaagi sa pagbugsay, apan gihapak silag kusog nga bawod nga miresulta sa pagkakulob niini.
Daling nasalbar ni Lopez ang unom ka mga menor de edad samtang, ang maantigong molangoy wala ra maunsa ug naluwas apan ang tulo nga silang Rosalyn Vecere Peligro, 31, taga Cebu City; iyang igsuong babaye nga si Ruby, 27; ug Albert Velonta Lopez, 24, igsuon ni Albert nangalumos human di maantigong molangoy.
Sa imbestigasyon sa kapulisan sa Alegria nasuta nga nag overloading ang motorbanca.