Kampanya batok kurapsyon

Niadtong Oktubre 4, 2017, gipirmahan ni Presidente Rodrigo Duterte ang Executive Order (EO) No. 43 nga nag-umol sa Presidential Anti-Corruption Commission. Matod sa EO, ang commission gimandoan sa diretsong pagabag sa Presidente sa pag-imbestigar o paghusay sa administratibang mga kaso nga naglambigit sa graft and corruption batok sa tanang mga tinudlo sa presidente.

Pagpakita kini sa administrasyong Duterte sa kaseryuso niini sa pagkombate batok sa graft and corruption nga usa sa iyang gisaad nga wagtangon ubos sa iyang administrasyon.

Apan sa unang duha niya ka mga tuig, nagsaka ang ranggo sa Pilipinas sa natad sa graft and corruption base sa Philippine Corruption Rank sa Transparency International. Sugod niadtong 2009, nag-anam na unta og kaubos ang ranggo sa Pilipinas sa natad sa graft.

Gikan sa ika 141 nga dapit sa 2008, nikanaog kini og maayo sa 105 niadtong 2012, atol sa panahon ni kanhi presidente Benigno Aquino III. Gikan sa 105, nikanaug pa kini ngadto sa 85 sa 2014, daku nga achievement alang sa nasod.

Apan niadtong 2016, nisaka kini og balik ngadto sa 101 samtang sa 2017, ika 111 na ang nasod.

Kini nagpakita nga bisan sa gipangsulti sa Presidente nga siya manglimpyo sa mga kukhan nga opisyal, nibalik ang kurapsyon, inay mag-anam na unta og kapapas.

Sukad siya namunoan, si Duterte nitaktak sa pipila sa iyang mga tinudlo nga opisyal nga giakusahan nga nakahimo og mga kahiwian. Apan, way mga balita kon kini nga mga opisyal napasakaan na ba og kaso.

Di lang kay kutob ra sa pagtaktak sa hiwi nga mga opisyal ang angay himuon sa Presidente, kon di iya usab untang ikiha ang mga nakalapas isip kaakuhan sa pagpangatungdanan. Mahimo kaha kiini ni Duterte?