Pain in my heart

Kanunay kong gidasig ni Adelfa. Tinuod gyud siyang amiga. Inanay kong naka-move on. Apan sa akong dughan, dunay mga higayon nga bation ko ang kasakit. Aw, di man kuno daling kalimtan ang first love. Unang gugma ko si Gabriel. “Kuyog ta sa amo sa Sogod, Del.”

Kausa gidapit ko si Adelfa. Duol na ang pista niadtong tungora sa among lungsod.

Wa magduha-duha sa pagtando ang akong amiga. Nalipay siya kay sa unang higayon makasuroy siya sa lungsod sa Sogod.

“Peaceful ang among lugar, Del. Duna tuoy ginagmay nga kagubot pero ma-settle man dayon kini. Di parehas sa ubang lungsod nga naa gyuy dagkong krimen.”

“Malingaw gyud ko didto sa inyo, Jeenky.” “Segurado gyud na, Del.” Nagkinidhatay mi si Adelfa. Unya, sa unang higayon sukad nga gibiyaan ko ni Gabriel, nahikatawa kog kusog.

“Basig adto sa Sogod nimo makita ang imong prince charming, Del. Pilian ka man gud. Kadaghan sa imong suitors dinhi pero wa gyud kay gisugot. Mga guwapo ug anak man unta silag dato?”

“Wa sa hitsura ug sitwasyon sa kinabuhi makita ang true love, jeenky. Naa ni sa kasingkasing. Well, basig matinuod nang imong giingon.”

Mikatawag kusog ang akong amiga.

Bisperas sa kapistahan sa among lungsod sa Sogod, mipauli ko ug mikuyog si Adelfa nako. Gabii ming nahiabot. Sa akong kuwarto matulog ang akong amiga kay dako man sab ang akong kama. Human mi manihapon, gisuroy ko ang akong amiga sa plasa. Kadiyot ra mi didto, gidala ko siya sa reclamation area. Nalingaw siya sa mga duwa sa peryahan.

“Mosakay tas pereswel, Jeenky.”

“Aw, sige.”

Puwete namong hudyaka ni Adelfa samtang nagtuyok na ang pereswel nga among gisakyan. Ang mga sakay mosiyagit kanang tua na sa kinatas-an ang ilang gilingkoran, mao sab mi si Adelfa.

Unya gisuroy ko ang akong amiga sa ubang lugar sa reclamation area. Presko kaayo ang hangin gikan sa lawod.

“Bag-o pa ning gipadak-an, Del.”

“Bitaw. Maklaro man.” Gikan sa reclamation area namalik mi si Adelfa sa plasa aron manan-aw sa kalingawan didto. Paborito namo ang Indian mango. Samtang naglakaw mi, nagsige mig ingkib sa hiniwa-hiwang manga. Unya gikasugat namo si Marlon.

Nagkatinan-away sila si Adelfa ug Marlon. (SUMPAYAN)