Maayong silingan

Managsilingan mi si Badong, nga usa ka karpentero. Si Anita, iyang asawa, labandera nga maoy tiglaba sa akong mga bulingong sapot. Gamay lang ang ilang balay nga hinimo sa sin ug tabla. Nag-abang ra kog lawak sa balay nga akong gipuyan nga gipanag-iya sa usa ka kawani sa City Hall. Nag-alagad ko isip usa ka pharmacist sa usa ka dakong botika sa downtown sa dakbayan sa Sugbo. Duha ra kaming lalaki nga pharmacist sa maong botika, si Nestor ug ako. Ulitawo pa ko sa edad nga 29. Sa akong banabana maguwang si Badong nakog usa ka tuig. Ang akong ginikanan tua magpuyo sa among lungsod sa habagatang bahin sa Sugbo.

Karong buntaga sa Dominggo ako ray nahabilin sa balay kay si Noy Bestre, ang tag-iya sa balay, ug ang iyang pamilya nangadto sa Tubod Mountain Spring sa Minglanilla aron mangaligo. Diha ko sa sala nagtan-aw sa basketbol sa PBA. Dihay misangpit sa akong ngalan. Gibuksan ko ang pultahan. Diha si Anita nga nagdala sa inutaw nakong mga sapot. Matahom ang pamayhon ni Anita bisan og nagmabdos sa una nilang liwat ni Badong.

“David, sitinta pesos imong bayranan,” direkta nga namulong si Anita nga mitunol sa akong mga sapot. Wala siya mopahiyom sama sa naandan inighatod niyag linabhan. Nagping-it siya.

“Nita, sakit imong tiyan?” matod ko nga mikuot sa akong pitaka aron bayran siya.

“Oo, ganina ra ni samtang nangutaw ko,” ni Anita nga mipugong sa iyang tiyan.

LAMBERTO G. CEBALLOS Cawayan, Dalaguete, Cebu

“Basig moanak na ka. Hain man si Badong?” matod ko nga nabalaka.

“Tua sa Carcar. May gihuman silang balay didto. Sa Martes pa to pauli!” ni Anita human dawata ang akong bayad. “Ari na ko, David. Mag-andam ko sa mga butang nga kinahanglanon sa akong pagpanganak. Basin tuod og karon na.”

“Sige. Tawga lang ko kon unsa ugaling … “matod ko nga mibalik sa sala.

Halawom na ang gabii dihang nadungog ko ang sangpit ni Anita. Ang pamilya ni Noy Bestre wa mamauli kay nag-overnight sa resort. Namaghot pod ang mga iro sa kasilinganan.

Nag-ilis ko ug nanaog ko gikan sa akong lawak sa itaas ug nagdali nga mipaingon sa balay nilang Badong.

“David dad-a ko sa ospital! Morag manganak na gyud ko!” ni Anita nga naggunit sa traveling bag nga gisudlan sa iyang mga sapot.

Giagak ko si Anita paggawas sa ilang balay. Ako’y nagbitbit sa iyang traveling bag. Giagak ko siya hangtod sa karsada. Gipara ko ang usa ka taksi ug nanakay mi paingon sa Cebu Maternity. Gidala si Anita sa ER. Gipabayad mig P10,000 nga deposito. Ang kuwarta nga dala ni Anita kay P3,000 ra. Ang akong kuwarta sa bulsa kay P5,000 ra. Maayo kay misugot ang kahera sa P8,000 nga deposito.

Nianang pagka Martes sa buntag nahiuli si Badong. Nahibulong siya kay wala si Anita sa ilang balay. Gisangpit ko niya.

“Tua si Anita sa maternity. Nanganak gahapon sa kaadlawon. Ako’y gadala niya,” tug-an nako kang Badong nga nagdali aron apason ang iyang asawa.

Normal ang pagpanganak ni Anita, Nianang Miyerkules sa udto nakapauli na siya sa ilang balay. Bisita nako si Badong nianang pagka gabii.

“Bay David, pasensiya una, ha? Di pa ko kabayad sa P5,000 karon. Pwede anam-anamon ko lang ni pagbayad?” matod ni Badong.

“Okey lang, Bay Badong,” matod ko nga mipikpikpik sa iyang abaga.

“Salamat, Bay David, sa imong kaayo!” ni Badong.

(KATAPUSAN)