Pilipinas, Australia isig pangayuay og pasaylo

Isi’g pangayuay og pasaylo ang basketball governing bodies sa Pilipinas ug Australia kabahin sa nahitabong karambola sa FIBA World Cup Asian Qualifier niadtong Lunes sa Philippine Arena sa Bocaue, Bulacan.

Sa usa ka hiniusang pamahayag nga giisyu kagahapon, ang Samahang Basketbol ng Pilipinas (SBP) ug Basketball Australia (BA) ningpadayag sa ilang dakong pagmahay nga nahitabo ang kagubot.

“The actions displayed have no place on any basketball court,” matod nila ni Al Panlilio sa SBP ug Ned Coten sa BA.

Ang karambola nabalita sa tibuok kalibutan hilabi na kay nalambigit niini ang magduduwa sa National Basketball Association (NBA) nga si Thon Maker sa Milwaukee Bucks.

Si Maker, kinsa usa sa duha ka mga magduduwa sa NBA nga sakop sa Australia, nakita nga misuway pag-flying kick sa mga magduduwa sa Gilas Pilipinas.

Siyam ka mga magduduwa sa Gilas ug upat sa Australia Boomers ang nanga-thrown out human sa karambola.

Sila na lang si JuneMar Fajardo, Baser Amir ug Gabe Norwood ang ningduwa sa Gilas sa pagpadayon sa kombati.

Giundang na lang ang duwa pabor sa Boomers dihang usa na lang ka magduduwa ang nahabilin sa Gilas.

“We wish to apologize to the entire basketball community worldwide – and in particular to our fantastic fans in the Philippines and Australia – for the behavior displayed by both teams and for bringing the game of basketball into disrepute,” dugang nila ni Panlilio ug Coten.

Nidugang sila si Panlilio ug Coten nga nakigtambayayong sila sa FIBA alang sa gihimong imbestigasyon kabahin sa nahitabo.

Ang mga magduduwa sa Gilas ug Boomers nga nangahilambigit sa kasamok pulos na sab nangayo og pasaylo.