MGA GANG MIREKRUT; PULISMISUSI

Nidangop sa kapulisan ang mga maestra sa Alcantara National High School human nila masayri nga adunay mga estudyante nila nga ning-apil og mga grupo o gang sa ilang tunghaan niadtong Huwebes.

Apan gipanghimakak sa usa ka school official nga dunay rambol nga nahitabo tali sa mga tinun-an.

Naalarma ang ang mga maestra human nila makit-i nga adunay mga paso sa piniling parte sa lawas ang pipila sa mao nga mga tinun-an nga kasagaran niini mga menor de edad.

Base sa imbistigasyon sa kapulisan, nasayan nga ang maong mga estudyante miyembro sa lahi-lahi nga grupo o gang sa maong tunghanan.

Si SPO3 Hene Aspira, imbistigador sa Alcantara Police Station nga nahinabi sa Superbalita Cebu, nagkanayon nga sa ilang pagpangutana sa mga tinun-an, tulo ka lahi-lahi nga ngalan sa gang ang nitumaw: The Brotherhood, Mangtas ug Pulang Araw.

Matod ni Aspira nga wa motug-an ang mga tinun-an kon kinsa ang ilang dako-dako o leader bisan unsaon nilag pagpangutana.

Dugang niya nga ang mga recruiter sa grupo ang ilang nailhan tungod kay mga tinun-an ra sab sa maong eskwelahan.

Nagplano na ang tunghaan nga mopahamtang og silot ngadto sa mga tinun-an kon mapamatud-an sa imbistigasyon nga mao kini ang nag recruit sa mga menor de edad nga estudyante.

Kasagaran niini anaa na sa hamtong nga pangidaron ug mao ang mosulsol sa mga bata nga moapil sa mga grupo o gang.

DI TINUOD

Si Jesusa Blanco, school head sa Alcantara National High School, niklaro nga way nahitabong kagubot o away tali sa mga estudyante sa maong tunghaan.

Kini sukwahi sa migawas nga post sa usa ka netizen sa Facebook nga nagkanayon nga nagkagubot o nag-away ang mga estudyante sa maong tunghaan.

“I would like to clarify that wala may nahitabong kagubot o away sa among school. Katong gi post sa social media, di to tinuod,’”matod pa niya.

Dugang pa niya nga ilang gipatawag ang kapulisan aron makahatag kini og legal advices kanila ug di tungod kay nagkagubot ang mga estudyante.

Apil sab sa gipatawag sa maong meeting ang mga ginikanan sa mga tinun-an nga mga miyembro sa gang aron masayod sila sa gisudlan nga grupo sa ilang mga anak.

Sukad nga na post ang maong reklamo, matod ni Blanco nga naguba ang imahen sa ilang eskwelahan.

Padayong nag-imbestigar ang kapulisan ug mga opisyal sa tunghaan.