SEX WORKERS PUSHERS NA SAB

BORING, KAUBAN SIKOP; SUPPLIER NAKUHAAN OG P1.2M SHABU

Giilang bigtime drug pusher sa barangay Duljo Fatima sa syudad sa Sugbo ang nasikop sa gihimong buy bust operation sa Cebu City Police Office Station 2 human nila unang nadakpan ang usa ka giingong prostitute.

Nasuta usab sa imbestigasyon sa kapulisan nga duna nay mga commercial sex worker sa uptown area sa siyudad sa Sugbo nga namaligya og illegal drugs.

Unang nadakpan atol sa paghingusog sa kapulisan batok sa ilegal nga drugas silang Marl (di tinuod nga ngan),22, taga Barangay Ocaña, siyudad sa Carcar, nga giingong boring ug ang kauban niini nga si Charlie Racho, 33, taga Valladolid.

Usa ka concerned citizen ang nihatag og tip sa Abellana police station sa modus ni Marl nga matod pa, gawas sa iyang pagbaligya sa pagkababaye, mohaylo usab ni sa iyang kostumer og ilegal nga drugas.

Nakuha kang Racho ang lima ka pakete sa gituohang shabu samtang usa ka gamayng pakate gikan kang Marl.

Sa gihimong imbestigasyon kanila, ilang gitug-an nga magkuhaan silag supply kang John Carl Gimpayan sa Barangay Duljo Fatima, Siyudad sa Sugbo. Ang maong drug personality gitudlo na usab ni sa ilang nadakpan pasado alas 5 kagahapon sa kaadlawon sa Sambag 2 diin duha usab ka tawo nga naaktohan sa usa ka abandonadong balay nga nanuyop nga silang Van Ryan Cruz, 44, ug Michelle Caballero, 33. Tungod niini, nilusad silag follow up operation diin nakig-alayon sila sa Mambaling Police Station batok sa gitugan ni Marl ug sa lain pang nadakpan sa ilang tinubdan pinaagi sa pag text niini.

Pagka alas 8 kagahapon sa buntag, ilang gilusad ang buy bust operation nga gipangulohan ni Senior Inspector Gomersido Mandawe nga niresulta sa pagkasikop nilang John Carl Gimpayan, hingkod, Joshua Enoc 18, ug Romeo Enriquez, 18, pulos taga Spolarium street, Barangay Duljo Fatima.

Unang transaction sa mga suspek didto sila mag abot sa Sambag 2, apan nausab ang hunahuna sa tulo ug gibalhin nila ngadto sa Duljo Fatima.

Nakuha sa ilang posisyon ang binulto sa gituohang shabu nga motimbang og 87.5 grams nga gibana-bana nga mokabat ngadto sa P1.2 million ang balor base sa Dangarous Drugs Board (DDB) value.

Matod ni Chief Inspector Maria Theresa Macatangay, hepe sa Abellana police station, nga lapad ang area of distribution ni Gimpayan sanglit moabot na sa General Maxilom avenue ang ilang supply.

Sa nakuha nga impormasyon ni Macatangay nga ang mga babaye nga mamaligya sa ilang lawas sa mao nga dapit mohaylo na usab og drugas sa ilang kustomer.

“Ang iyang customer ani dili lang sa Duljo kay maabot man sa Mango sa pagpamaligya. So, dako ni iyang area of distribution sa illegal drugs,” matod ni Macatangay.

Naa usab ni sa target list sa Mambaling police station si Gimpayan nga sa ilang monitoring makabaligya og dinagko. /