Cebu City naalkanse og P1.6 billion, matod sa COA

Tungod sa karaan nang ordinansa sa buhis, ang Cebu City Government naalkanse og P1.6 billion sa iya untang kitaon, matod sa Commission on Audit (COA).

Sa iyang annual audit sa financial transactions 2017 sa Siyudad, ang COA niingon nga ang Revised Omnibus Tax Ordinance niadto pang 1994 gipatuman ug wa mabag-o hangtod karon.

Ang P1.6 billion nga umento unta sa collection sa 10 porseyento sa tanang local taxes, ang COA niingon nga mopasaka unta kini og maayo sa panalapi sa Siyudad nga magamit unta sa nagkadaiyang mga proyekto.

Ubos sa Section 191 sa Republic Act (RA 7160) kun Local Government Code of 1991, naglatid nga ang tanang local units dunay gahom sa pag-adjust sa tax rate nga suma sa gilatid di manobra og ka usa matag lima ka tuig, apan kinahanglan di manobra ang adjustment sa 10 percent sa rates nga gitakda ubos sa balau.

Ang COA nirekomendar sa Siyudad nga bag-uhon ang Revised Omnibus Tax Ordinance.

Sa iyang bahin, si Acting City Treasurer Veronica Morelos niingon nga ang iyang buhatan nahuman na sa ilang draft amendment ordinance nga mopaumento sa ilang business tax.

“The draft that was prepared by the City Treasurer’s Office was done but one of the councilors is still reviewing it,” siya niingon.

Kon kini mahuman, matod ni Morelos nga iduso kini ngadto sa City Council aron masusi ug maaprobahan.

Ang gi-propose nga business tax increase, matod ni Morelos mao ang unang amendment sa tax ordinance karon sa Siyudad nga gipatuman niadtong 1994 pa.

Sa real property taxes, si Morelos niingon nga ang City Assessor Office mao ang incharge sa pagsuway sa amendment alang sa pagpasaka sa rate.