Kaso ni Peter Lim hukman sa prosecutors
Ang Department of Justice (DOJ) niduso na sa resolution alang sa drug-related nga kaso nga gipasaka batok sa giakusahang Cebubased drug lord, Peter Lim.
Si Senior Assistant State Prosecutor Juan Pedro Navera niingon nga ang panel of prosecutors nitapos sa preliminary investigation sa kasong kalapasan sa Republic Act 9165, kun Comprehensive Dangerous Drugs Act of 2002, nga gipasaka batok kang Lim, Kerwin Espinosa ug daghan pa.
Sa sayo pa, ang DOJ panel prosecutors nga gipangulohan ni Navera nitugot sa appeal ni Lim alang sa lahi nga preliminary investigation.
Sa iyang mosyon, si Lim niingon nga “the obvious lack of evidence against him might not be given due attention in view of the number of respondents and transactions involved” sa kaso.
Matod ni Navera, si Lim napakyas sa pagtambong sa duha ka mga preliminary investigation sa iyang kaso ug pagduso sa counter-affidavit.
Inay iyang gisagop ang counter-affidavit nga iyang giduso ngadto sa first panel sa mga prosecutor sa miaging tuig.
Ang abogado ni Lim nga si Magilyn Loja, nitumbok sa hulga seguridad ni Lim nga rason sa iyang kapakyas sa pagtambong sa preliminary investigation sa kaso.
Niadtong uwahing bahin sa Marso, ang igsuon ni Peter nga si Wellington, gisuwayan sa pag-ambush sa armadong mga tawo, apan nakaipsot.
Sukad niadto, wa nay nasayod hain na ang magsuong Lim taliwa sa mga taho nga nakit-an sila sa Mactan Cebu International Airport (MCIA).
Way bisan usa sa pamilya o ilang abogado ang nikompirmar niini.
Niadtong miaging Sabado, ang Infinity KTV nga giingong iya ni Wellington gisuwayan sa pagsunog.
Sa Biyernes sa kaadlawon, ang Hilton Motors sa Mandaue nga giingong iya ni Peter gibombahan, apan nagtuo ang kapulisan nga tungod kini sa labor dispute.