8 nasikop sa mga buy bust sa Lapu

Upat ka mga lalake nadakpan sa lain-laing buy-bust operations (Oplan Banat) sa Barangay Pusok, siyudad Lapulapu kagahapon sa kaadlawn.

Ang mga dinakpan giila nga sila si Roden Igot Larayos, 35; Jake Baguio Barret, 40; Reynaldo Cabardo Belarmino, 47; ug si Jade Geverda Astilla, 20, parehas nga taga sitio Opa, Barangay Pusok, siyudad sa Lapu-lapu.

Adunay impormasyon nga nadawat ang kapulisan nga si Larayos ug Belarmino kanhi may kalambigitan sa illegal drug trade sa sitio Opa, Barangay Pusok.

Sa dihang napamatud-an sa kapulisan ang maong impormasyon, nagpahigayon sila og buy-bust operation.

Nakuha sa posisyon ni Larayos ang 12 ka gagmayng pakete sa gituohang shabu, usa ka coin plastic container.

Nakuhaan usab si Barret og usa ka P500 nga gituohang kita sa ilegal nga kalihukan. Ang nakuha sa ila gibana-banang .65 grams og gibana-banang nagkantidad og P7, 670.

Si Belarmino nakuhaan usab og siyam ka gagmay nga mga pakete sa gituohang shabu, usa ka coin purse.

Nakuha sab sa posisyon ni Astilla ang duha ka P100 nga gituohang kita sa ilegal nga kalihukan, usa ka .22 caliber revolver, unom ka live ammunition sa .22 caliber.

Sa laing bahin, nadakpan sab atol sa buy-bust operations sila Arjie Flores, 23; Rabie Bonghanoy Flores, 35; Jocelyn Piamonte Gayo, alyas “Pagong”, 36; ug si Ernesto Malubay Espinosa, 52, sa sitio Ylaya, barangay Marigondon, siyudad sa LapuLapu niadtong Biyernes sa gabii.

Nakuha atol sa operation ang pito ka gagmay nga pakete sa gituohang shabu ug tulo ka piraso sa P100 nga giingong buybust money nga gipanag-iya ni Rabie Flores. May gibug-aton kini nga 1.28 ka gramo nga kantidad og P4,400.

Nasakmit sab gikan ni Piamonte “Pagong” ang napulo ka gagmayng pakete sa gituohang shabu nga may kantidad nga P2,200 ug duha ka piraso nga P100 nga giingong buy-bust money.

Mga kasong pagpamaligya sa illegal drugs ang ipasaka sa kapulisan batok sa mga suspek.