Israel ‘nangawat’ og panganod sa Iran: Gen. Jalali
Dugay na nga dunay tensyon tali sa nagkabangi nga mga nasod, ang Israel ug Iran.
Apan karong bag-o, ang kasungian sa duha kay niabot na sa pasangil nga nangawat og panganod ang pikas nasod aron dili makatagamtam og ulan ang usa, hinungdan nga nasinati ang kanihit sa tubig.
Si Iranian General Gholam Ridha Jalali namahayag nga ang nasinati nga sobra kainit sa ilang nasod kay epekto sa pag-apil-apil sa ubang nasod sama sa Israel ug laing nasod nga wa niya nganli.
Sa press conference, matod niya, nagtinabangay ang maong mga nasod aron ang mga panganod nga mosud sa Iran dili magdala og uwan.
Si Jalali, pangu sa civil defence organization, nipasangil nga ang nasinati nga kanihit sa tubig ug uwan sa Iran gumikan kay gikawat sa Israel ang mga panganod dapit sa Mediterranean Sea.
Sa report sa The Independent, nasayran bisan ang kaugalingon nga meteorological service sa Iran kay namahayag nga imposible nga dunay mahitabo nga kawat sa panganod ug uwan.
Si Ahad Vazife, opisyal sa Meteorological Organization sa Iran, nisulti sa Iranian Students’ News Agency nga imposible makawat ang mga panganod ug uwan gikan sa laing nasod.
Matod niya, ang tibuok rehiyon ug ang Iran nakasinati og huwaw hinungdan nga minos ang uwan sa ilang nasod.
Nagkatensyon ang Israel ug Iran dihang nakahukom ang Estados Unidos nga mobakwi sa nuclear deal niadtong 2015 ug ang Tehran niimpluwensiya usab sa Syria. Ang Iran unang nanaad nga gubon ang Jewish state human sa Islamic Revolution niadtong 1979.