Taytayan sa Cebu Cordova

Nagsugod na ang pagtukod sa dakong taytayan nga mosumpay sa lungsod sa Cordova ug Syudad sa Sugbo. Ang lungsod nga nasuok luyo sa Syudad sa Lapu-Lapu mahimo nang ganghaan sa isla sa Mactan.

Sa miaging Huwebes, gipahigayon ang usa ka seremonyas isip kasaulogan sa pagsugod sa pagtukod sa taytayan.

Dunay blessing didto mismo sa lawod, duol sa Shell island diin dunay dakong barge nga nagsugod nag tugsok og mga higanteng mga tubo isip pundasyon unya sa taytayan.

Gipakita sa usa ka video unsaon ang modernong pagtukod sa maong taytayan.

Nalipay ko kay halos kada adlaw sa akong pagbiyahe gikan sa balay sa Syudad sa Talisay padung sa Syudad sa Sugbo, ako unyang makita sa aktwal ang maong gipakita sa video.

Gi-target nga mahuman ang maong taytayan karong 2021, ang kasaulogan sa ikalimang sentenyal sa pag-abot ni Ferdinand Magellan sa Sugbo kaniadtong Abril 1521.

Tungod niini, gilantaw ni Sec. Addy Sitoy nga mopaspas pagmaayo ang kalambuan sa Cordova inig ka human sa maong taytayan.

Ug wala siya maglangay. Iya nang giduso karon ang mga plano kabahin sa pagtukod og mga lagpad nga kadalanan nga mosumpay sa maong taytayan padulong sa Mactan-Cebu International Airport (MCIA).

Tungod sa maong taytayan, gilantaw nga madayon na sab ang dakong reclamation project sa Cordova.

PEDERALISMO

Atong malantaw nga mopaspas na ang proseso kabahin sa pederalismo karong nahuman na ang consultative committee nga gitukod ni Presidente Rodrigo Duterte aron mohimo og draft constitution nga maoy paaprubahan sa Kongreso ug Senado nga mo-convert ngadto sa usa ka Constituent Assembly o ConAss.

Gilantaw karon nga iduso kining draft federal constitution ni Presidente Duterte sa iyang State of the Nation Address (SONA) karong Hulyo 23, 2018. Atong nadunggan nga nagsugod na sab ang pipila ka sector sa pagpakisayod bahin sa maong kalambuan ug unsa gyud kining pederalismo. Maghisgot unya ko dinhi sa atong kulom kabahin sa mga detalye niining maong kalambuan.

INTERNET

Paeta niining balita nga ang average internet download speed kuno sa Manila nga 16.9 mbps apil sa labing hinay sa tibuok kalibotan.

Maglugos man gani moabot og 10 mbps ang among download speed bisan og 50 mbps maximum ang among gikuha.

Matod pa sa taho sa OpenSignal nga naulahi pa ang Manila sa Phnom Penh ug Bangkok.

Sa laing bahin, ang Singapore ug ang Seoul apil sa labing kusog nga mga download speed nga subra pa sa 45 mbps.