Balikbayan
Lisod ilarawan ang bation sa tawo nga mobalik sa iyang yutang natawhan human milangyaw sa taas nga panahon. Ang mga gipangpugngan nga pagbati ipabuhagay. Ang pinulongang naandan madungog na pod nga walay pagpugongpugong. Makakaon na sa mga gipangandoy nga pagkaon. Makakita sa mga lugar nga dugay nang gihandum. Mao kini ang gitawag nga “balikbayan” ug ang mga karton nga puno sa sinugatan, “balikbayan box”. Malipayon nga panahon ang pagbalikbayan.
Apan dili tanang higayon malipayon ang mobalikbayan. Mibalik si Jesus sa iyang lungsod nga nadak-an, ang Nazaret. Sa sinugdanan, napahingangha ang tanan: “Diin man kuhaa niining tawhana kining mga butanga? Ug unsang matanga sa kaalam kining gihatag kaniya, ug kining mga katingalahang mga buhat nga gihimo sa iyang mga kamot?” Tungod man god kini sa mga makadani nga pulong nga midagayday sa iyang bábâ.
Apan usa pa siya makabuhat og mga katinglahang buhat, miingon sila: “‘Dili ba kini ang panday, ang anak ni Maria ug igsoong lalaki ni Santiago, ug ni Jose, ug ni Judas, ug ni Simon? Ug dili ba ania man uban kanato ang Iyang mga igsoong babaye?’ ug wala sila motuo kaniya.” Daliang mibag-o ang dagan sa hangin sa gitawag nga “public opinion”. Ang balikbayan nga gidayeg, gisalikway na. Ang alaot mao ang nagkulang sa Binasi sa: Ezekiel 2:2-5; Salmo 123; 2 Corinto 12:7-10; Marcos 6:1-6 pagtuo: “Ug wala siya makahimo didto og mga milagro gawas sa pagtapion sa iyang mga kamot ug pag-ayo sa pipila ka mga masakiton.”
Kining pagkabalikbayan mahimong itandi sa pagbalik ngadto sa Ginoo. Mao kini ang mensahe nga ipasulti sa Ginoo ngadto sa mga Israelita pinaagi ni propeta Ezekiel, bisag maminaw sila o dili. Mingrebelde sila sa Dios ug gipatig-a nila ilang mga kasingkasing. Ang pagbalik-Ginoo maoy labing hingpit nga pagkabalikbayan kay gikan baya kita sa Ginoo ug diha kaniya ang atong hingpit nga kalipay ug kahulogan.
“Sa dihang huyang ako, nan kusgan ako,’ miingon si San Pablo. Daghang naagiang kalisdanan si Pablo: mga kahuyang nga tawhanon, mga pagpanglutos, ug uban pa. Ang mga kalisdanan kahimtang sa tawo nga wala pa mobalik sa iyang yutang natawhan. May dugang pang rason ang kalisdanan ni Pablo. Dili buot sa Dios nga modako ang iyang ulo. Nan gihatagan siyag pagsulay sa lawas aron siya magpabiling mapaubsanon.
Samtang ania pa kita sa kalibutan, dili malikayan ang mga pagsulay. Pagbansaybansay kini sa atong umaabot nga pagbalik sa Amahan. Kahimtang sa tawo nga wala pa makabalik sa gigikanan. Ginoo, dili yuta, ang atong gigikanan ug hangtod nga wala pa kita makabalikbayan ngadto sa Dios.
Pangandaman nato ang atong pagbalik-Ginoo.