Pain in my heart
Sa akong paniid kang Adelfa hilom gyud siyang nakagusto kang Marlon. Ambot ba sab, uy. Hilom man kong gisakitan. Na, ako ra sab ang mabasol kon ang gugma ni Marlon nako mapunta na sa akong amiga. Unsaon, wa ko man tagda ang iyang pagpangulitawo nako.
Si Gabriel man ang gihatagan kog dakong pagtagad bisag wa na siya magtagad nako. Gipalabi ko ang gibating kasakit sa akong dughan kay sa paghatag og laing higayon nga magmahal sa laing lalaki? Ug si Marlon na unta kining lalakiha.
“Adto ta sa ubos, Del, Mar. Manan-aw tag Panagsogod Festival.”
Nakahuman na mig panimba niadtong tungora. Mikidhat si Adelfa nako.
“Sige, Jeenky. Gusto sab kong motan-aw sa inyong festival. Nakadungog na ko ani. Alegre sab kuno.”
“Tinuod na, Del. Malingaw gyud ka.”
“Seguradong magsige na kog anhi sa inyong lugar, Mar, bisag way pista.”
Mitan-aw si Adelfa nako ug iya na sab kong gikidhatan. Unya nagkatinan-away mi si Marlon. Malipayon siya. Samtang ako, wa gyud makasabot sa akong gibati.
Naunsa ba ko, uy? Hilom kong nagyawyaw. Gusto kong kasuk-an ang akong kaugalingon. Ako ang nagdala kang Adelfa dinhi sa Sogod. Apan wa gyud ko magdahom nga makagusto siya kang Marlon. Ingon gyud diay ani ang gugma, moabot lang sa tawo nga di mahibaw-an, sa bisan unsang panahon ug sa bisan asang lugar.
Human sa among pagtan-aw sa Panagsogod Festival giimbetar mi ni Marlon og paniudto sa ilang balay. Duna man sab mi hikay. Gusto unta kong mobalibad apan nasabtan nako si Adelfa nga gustong moadto sa ilang Marlon.
Hilom na lang kong mikuyog kanilang duha. As usual, inasal nga baboy, inatayan, humba, sweet and sour nga dagkong isda, softdrinks ug fruit salad ang giandam nilang Marlon. Ingon sab ani ang mga pagkaon sa among balay.
Nagpaniid lang ko kanilang Adelfa ug Marlon nga malipayong nag-estoryahay samtang nagkaon. Nagtupad gyud sila paglingkod.
“Adto na sab ta sa amo, Mar. Kuyog namo ni Adelfa.” Giimbetar ko si Marlon. “Anhi lang una ko, Jeenky. Duna pa sab koy mga bisita nga gihuwat.”
Igo na lang kong mitando. Sa among pagpanglakaw ni Adelfa, nagpanglingi siya kang Marlon nga nagtindog sa gawas sa ilang gate.