'XAVI' BUNGA SA KALIPAY
Pangandoy sa kadaghanan sa bag-ong mga kinasal nga makabaton og anak nga mokumpleto sa ilang pamilya.
Sama kini sa bag-ong magtiayon nga sila si PJ ug Diane Higida-Patricio.
Ang duha unang nagpakasal pinaagi sa sibil nga seremonyas nga gihimo ni Boljoon Mayor Merlou Derama niadtong Pebrero 4, 2017.
Pagka Disyembre 16, 2017, sila nagpakasal usab sa St. Michael The Archangel Parish sa Argao, ang lungsod ni Diane. “Mao jud na ang among
wish nga magka-baby,” paambit ni Diane sa pakighinabi sa Superbalita Cebu kagahapon.
Siya nisugilon nga hilabihan ang kalipay nga ilang gibati dihang ilang nahibaw-an nga siya nagsabak sa ilang unang liwat ni PJ.
Human sa dul-an lima ka buwan sa ilang kasal sa simbahan, ang ilang pangandoy nahatagan og katumanan pinaagi sa gasa gikan sa kahitas-an, usa ka mahimsog nga batang lalake, si Ethan Xavier Patricio nga gianggaan nila og Xavi.
Si Diane nanganak ni Xavi niadtong Mayo 7, 2018 sa alas 7 sa buntag pinaagi sa Caesarean Section sa Cebu Doctors’ University Hospital.
Ang bata nitimbang og sayis libras.
Niadtong Hunyo 23, 2018, gibunyagan si Baby Xavi ni Padre Ruben Bajenting sa samang simbahan diin gikasal sila si Diane ug PJ.
Gisunod ang salo-salo sa ilang panimalay sa Argao diin gihimo usab ang blessing sa gipahimo nga ekstensyon sa balay sa magtiayong Patricio.
Si Xavi ang unang liwat nila ni Catalino ug Jocelyn Higida, mga ginikanan ni Diane. / SCG