CESAFI FINALS KARON

Mga duwa karon

1:00 pm- UC batok USJ-R (jrs. for 3rd)

2:30 pm- USPF batok USJ-R (srs. for 3rd)

4:00 pm- UV batok USPF (jrs. finals)

5:30 pm- UV batok UC (srs. Finals)

Magsangka sa main game karong hapon ang University of the Visayas (UV) Green Lancers ug University of Cebu (UC) Webmasters sa Game 1 best-of three finals series sa Cebu Schools Athletic Foundation Inc. (CESAFI) 2018 Partner’s Cup Pre-Season Tournament College Division sa Cebu Coliseum.

Ang Green Lancers nga ninghuman sa elimination round dala ang 6-0 nga record makonsidera nga inilog og gamay nining sangkaa.

Apan kon molugak bisa’g gamay ang Green Lancers ni coach Gary Cortes hayan mapahimuslan kini sa Webmasters ni coach Raul “Yayoy” Alcoseba aron mabalit-ad ang senaryo ning maong panagparang.

Ang Webmasters ninghuman sa elimination round nga nagsunod sa Green Lancers bitbit ang 5-1 nga record.

Sa premirong panagharong sa duha ka mga kampo, niagi og pagpanghudlat ang Green Lancers una nila nabuntog ang Webmasters, 80-74.

SECONDARY

Sa high school division finals series, magkombati ang UV Baby Green Lancers batok University of Southern Philippines Foundation (USPF) Baby Panthers.

Sa premirong panagsangka sa duha ka mga kampo, gipakaging sa Baby Panthers ang Baby Green Lancers, 78-73 niadtong Hunyo 9 atol sa pagsugod sa kompetisyon.

Gilaumang sikit gihapon ang kombati sa duha ka mga kampo ning higayona.

Sa inilugay sa ikatulong dapit nga pulos knockout matches, magsangka ang UC Baby Webmasters ug University of San Jose Recoletos (USJ-R) Baby Jaguars sa high school division sa premirong duwa.

Mosunod ang panagparang sa USPF Panthers ug USJR Jaguars sa college division.