Talisay kampiyon sa south
Gilubong sa Talisay Aquastars ang Sibonga Pillars, 96-69 sa game two aron langkaton ang titulo sa south division sa 2nd Governor’s Cup Inter-Cities/ Municipalities nga gipahigayon sa Sports Complex sa lungsod sa Sibonga niadtong Biyernes sa gabii.
Ang Aquastars ni coach Rey Gurrea nga padayong limpyo ang baraha, 12-0 sukad pa sa elimination round sa kompetisyon nga alang lang sa nagpanuigon og 21 anyos paubos, sayon nga miarangkada ug wa mohatag og higayon sa Pillars hangtod sa pagtingog sa katapusang buzzer.
Sa makausa pa si Jay Deiparine maoy nangulo sa Aquastars ni coach Gurrea ug assistant coach Jurrie Violango pinaagi sa iyang 24 puntos.
Grabeng dominasyon ang gipakita sa Talisay ilabi na sa ilawom nga bahin nga gipatigbabawan nila ni Kendrick Abarquez ug Elmer Echavez.
“At least nakasud gyud ta sa finals. Wa ko magdahom nga one-sided ang resulta kay homecourt gud ni sa Sibonga pero morag naleksiyon ang mga bata sa game one kay hapit man ta mapildi,” matod ni Gurrea.
Ang Sibonga niduwa nga wa ang ilang headcoach nga si Baby Bugtai kinsa nag-atiman sa iyang asawa nga naadmit sa hospital.
Ang Talisay nga nidaog sa game one, 93-70, makigsangka sa makampiyon sa north division sa best-of-three finals tali sa Consolacion Sarok Waivers ug sa San Francisco, Camotes nga sugdan karong gabii sa korte sa San Francisco.
Giangkon ni Gurrea, kanhi sakop sa USJ-R Jaguars nga wa pa gyud siya makakita sa duwa sa San Francisco ug sa Consolacion apan bisan pa niini hugot kini nilang pangandaman. “Wa pa sad mi kita sa duwa sa San Fran ug sa Consolacion. Pero basin maka-scout mi nila sa ilang Game Two,” matod ni Gurrea.