P44.3-B DRAINAGE PROJECTS

ALANG SA PAGPAKGANG SA LUNOP SA METRO CEBU

Mokabat og P44.3 bilyones ang pagpatuman sa Department of Public Works and Highways (DPWH) sa

mga proyekto ubos sa integrated flood control and drainage system master plan alang sa hingpit nga pagsulbad sa suliran sa pagbaha sa Metro Cebu.

Sa presentasyon ni Engr. Luis Paredes, regional project manager sa DPWH 7 atol sa Mega Cebu Update labot sa mga proyekto nga gipakigtambayayongan sa Metro Cebu Development and Coordinating Board (MCDCB), nahibaw-an nga lima ka dagkong mga proyekto ang gisugyot alang sa pagpalambo sa drainage system ug flood control sa Metro Cebu.

Naglakip kini sa P27.7 bilyones alang sa pagpalambo sa kasapaan sa Metro Cebu, P3.6 bilyones alang sa paghimo og diversions channels, P8 bilyones alang sa drainage mains, P300 milyones alang sa flow control systems ug P4.5 bilyones alang sa housing units sa mga informal settler.

Karong tuiga, unom ka mga sapa ang papalambuon sa DPWH 7 nga gigahinan og P600 milyones. Naglakip kini sa mga sapa sa mga barangay Bulacao, Tejero, ug Guadalupe sa dakbayan sa Sugbo, Tipolo ug Subangdaku sa siyudad sa Mandaue ug sa dakbayan sa Carcar. Tag P100 milyones ang gitagana nga pundo sa DPWH alang sa civil works sa lima ka mga sapa, way labot sa Subangdaku nga may laing gahin nga P100 milyones alang sa right-of-way.

Matod ni Paredes, nga gicluster nila sa usa ka package ang pagpalambo sa maong mga sapa nga target nila mapa-bid karong Agusto.

Alang sa 2019, P600 milyones ang ilang gipangayo nga pundo alang sa pagpaugmad sa mga sapa sa Tipolo, Kinalumsan ug Subangdaku nga tag P200 milyones matag usa.

Samtang ubos sa package 1 nga gipundohan og P684 milyones, gipabutangan og steel sheet piles ang mga sapa sa Tipolo, Subangdaku ug Kinalumsan nga gisugdan niadtong Pebrero 26 ning tuiga ug mahuman sa Mayo 10, 2021. /