Planta sa MCWD di na madayon sa Brgy. Umapad

Tungod sa presensya sa combustible gas apil ang methane, dili na madayon ang pagpatukod sa Metropolitan Cebu Water District (MCWD) og septage treatment plant sa Umapad landfill sa dakbayan sa Mandaue.

Atol sa Mega update sa mga proyekto sa Metro Cebu Development and Coordinating Board (MCDCB) kagahapon ngadto sa mga sakop sa media, namahayag si Engr. Emmanuel Espina, senior corporate specialist sa Metropolitan Cebu Water District (MCWD), nga delikado ang pagpatukod ug ang pag-operate og pacilidad sud sa landfill sa Barangay Umapad kay duna kini methane.

Matod niya, base sa soil testing o soil investigation sa mga consultant sa study team sa Japan International Cooperation Agency (Jica), nahibaw-an nga gibanabanang siyete ngadto sa 10 metros ang gibag-on sa basura sa Umapad landfill.

Sumala ni Espina unya pa mahimong magamit human sa 10 hangtod sa 15 ka tuig ang maong landfill gikan sa pagsirado niini aron maseguro ang kaluwasan ug stabilization base sa balaod sa Ministry of Environment Law sa Japan.

Duha pa lang ka tuig nga nasirad-an ang Umapad landfill. Laing gikonsiderar sa MCWD mao Inayawan landfill ug North Reclamation Area sa Cebu City.