17 anyos gilugos sa kasagbotan

Usa ka 17 anyos nga batang babae gi-rape samtang gisugo sa iyang maguwang sa pagkuha og kamungay sa hilit nga dapit sa Barangay Luka, lungsod sa Oslob, Cebu niadtong Huwebes, pasado alas 4:00 sa hapon.

Sumala sa biktima nga sa dihang mokab-ot sa kamungay, kalit lang naglain ang iyang tiyan ug nipahipi siyag dalidali sa kasagbutan. Sa dihang pagpungko niya kalit, nitumaw ang suspek ug daling bunlot sa biktima.

Si Narciso Vasquez, 58, construction worker, ulitawo ug molupyo sa Luka ang gitumbok sa biktima nga maoy nilugos kaniya.

Matod ni PO2 Arnie Rendon, nisuway pagbuhi ang 17 anyos apan dili siya kalihok sa kusgan sa suspek hinungdan nga naangkon ang iyang pagkababaye.

Wala kaagwanta ang biktima og nisumbong kini sa kapulisan ug iyang gisaysay ang maong hitabo kaniya.

Giaksiyunan dayon pag-adto sa ilang balay ang maong suspek apan nakalakaw na kini sa bukid busa gihimo ang operasyon nga gipanguluhan sa Regional Mobile Batalion 7 uban kapulisan sa lungsod ug nasikop ang suspek.