Mabatid gireklamo sa hotel, gitaktak ni Osmeña sa BOPK

Ang bag-ong napili nga barangay kapitan sa Mabolo nga si Prisca Nina Mabatid gireklamo sa tagdumala sa Cebu City Waterfront Hotel and Casino sa Lahug human nga giingong nanapat ang kauban niini sa kawani sa hotel.

Nahitabo kini niadtong Hunyo 19 apan kagahapon nahibaw-an human nipasaka og reklamo sa Ombudsman Visayas ang tagdumala sa hotel.

Ang Superbalita Cebu nikontak kang Mabatid alang sa iyang habig sa isyu apan nagdumili sa pagkomentaryo uban sa pahayag nga mopagawas siya og opisyal nga pamahayag atol sa ipatawag nga press conference karon.

Mikatap karon social media ang kuha sa close circuit television (CCTV) nga makita si Mabatid uban ang usa ka lalake nga giila nga si Ramon Floresta.

Maklaro sa video nga adunay panaglalis tali ni Mabatid ug sa lalake nga kawani sa hotel samtang si Floresta maoy niuwang sa duha. Nagpadayon sa ilang lalis ug kalit gipatiran ni Floresta ang lalake ug gisiko ang floor manager.

Ang hepe sa Mabolo police station, Sr. Insp. Dindo Alaras, niingon nga narrative entry ang gihimo sa management sa hotel kay ang tumong ang pag-record sa insidente.

Samtang, si Mayor Tomas Osmeña nipalagpot na ni Mabatid isip sakop sa Bando Osmeña Pundok Kauswagan (BOPK). “I do not care that she leads one of the biggest barangays in Cebu City. even if 2019 (elections) is just arund the corner. Effective immediately, Captain Mabatid is no longer a member of BOPK. She has closed (kicked?) the door shut on herself.“